Jurip biang u ma Sniawbhalang Dhar iaka Kiang Nangbah Stadium, angnud ban pynheh iaka gallery

Syllad | The Rising MeghalayaJune 17, 2025

U Symbud Myntri Rangbah ka Jylla, Ma Sniawbhalang Dhar, ha ryngkat ka jingsynrang lang jong u MLA ka Jowai Ma Wailadmiki Shylla, haka 16 tarik Jylliew u la leit jurip biang iaka madan Kiang Nangbah Stadium ha Ladthadlaboh, Jowai, kum shi bynta ban pynkhreh na ka bynta ka lympung ialehkai National Games 2027.

Ha kane ka sngi, la don ryngkat lang ruh ki nongialam ka West Jaintia District Sports Association (WJDSA) ba kynthup ia u President Ma EMH Passah, u General Secretary Ma Lammat-o Laloo, u Vice President Ma Patrick Lamare, u Assistant Director ka tnad Sports & Youth Affairs, u District Sports Officer Ma Khroobok Passah, lem bad ki Engineer na ka State Sports Council bad PWD.

U Ma Dhar u la jurip bniah ia ki bynta bapher bapher jong ka madan – naduh ki jaka peitkai (gallery), ki surok rung mih, bad ki jaka pynieng kali. Ha ka jingiatai bad ki nongkitkam ka WJDSA, ula ai jingmut ban pynduh noh ia u synthetic track bad ban pynkynriah shakhmat ia ka gallery na ka bynta ban pynmih jaka pynieng kali kaba kham kylluid. Hynrei na ka liang ka WJDSA ka la kyntait ia kane bad kyntu ba dei ban pynbha ia ka madan katkum ka jingdon jaka. U Ma Dhar ruh u la pdiang ia katei ka jingai jingmut.

Haba kren sha ki lad pathai khubor, u Ma Sniawbhalang Dhar u la pynpaw ba kane ka dei ka sien kaba ar ba ula jurip ia kane ka madan, da ka jingthmu ban sdang noh kloi ia ka jingpynbha ia ka stadium shibynta ka jingpynkhreh iaka National Games 2027.

Haba iadei bad ka jingtei jingshna iaka madan, u Ma Sniawbhalang Dhar ula ong ba ka don ka jingeh khyndiat namar ka jingduna palat ka jaka hynrei yn pyrshang ban shna katba shah ka jaka. Ula iathuh ruh iaka thong ba hakhmat eh ka long ban pynbiang shwa iaka Gallery ha baroh saw liang jong ka madan.

Haba iadei bad ka jaka pynieng kali ne parking, u Ma Dhar ula pynpaw ka jingeh namar ba duna ka jaka hynrei wat la katta ula ong yn pyrshang ban shna shadien jong ki Gallery bad ruh ban wad ki lad ki lynti ban shna ia kawei ne ar ki surok na ka bynta ban rung ban mih na kane ka madan khnang ban lait na ka jingkhapngiah haba pynlong iaki lympung baheh.

Naka liang u Ma Wailadmiki Shylla ula ong, kum u MLA ka thain u don ka jingthrang jingangnud ban pynbha pynmiat iaka Kiang Nangbah Stadium namar kadei ka madan kaba la rim tam ha rilum Jaintia. Ula ong ruh ba kala don ka jingangnud ban pynshna iaka madan kumba long ha Wahiajer hynrei ka long kaba shitom namar kane ka madan ka don hapdeng sor hynrei wat la katta ngin pyrshang ban pynshna pynmiat katba lah.