Jop ka West Jaintia Police iaka Evergreen da 131 run haka District Cricket League ka WJHDCA

Syllad | The Rising MeghalayaApril 22, 2025

Ka West Jaintia Police CC kala jop da 131 run pyrshah iaka Evergreen SC &CC haka jingialehkai District Cricket League kaba pyniaid da ka West Jaintia Hills District Cricket Association (WJHDCA) kaba long ha Khliehtyrshi haka 22 tarik Iaiong.

Haba jop iaka toss ka West Jaintia Police kala tied shuwa ban kala kamai 196/7 na ka 35 over. U Devention Lyngdoh ula kylla long u namtam ha kaba marwei ula synniang 90* run (not out) sha u sup u thiar kamai run jong ka kynhun kaba la ai mynsiem iaka kynhun baroh kawei. Ula khyrwit 3 tylli ki sixes bad 10 tylli ki fours ha kaba ula banbor shisha iaki nongkawang ball ka Evergreen.

Shuwa ba un mih madan lai ngut ki nongtied kiba hakhmat jong u kim shym la lah satia ban seng iaka nongrim kamai run bad haduh ba kila liem kila kamai tang 37/3. Dei haba hiar madan u Devention bad ka jingkyrshan lem u Habanjop Khonglah uba la kamai 23 run na ki 45 ball kila buh iaka thong kaba heh kaba la kot haduh 197.

Haba phai sha ki nongkawang ball ka Evergreen u Lodumaitphang Khonglah, ula khur marwei 3 wickets na ki 7 overs.

Haba beh iaka thong ka Evergreen kala iatakhuh mawsiang namar ki nongtied jong ka kila khyllem uwei hadien uwei. Tang ar ngut ki nongtied ka Evergreen kiba poi ar dak jingkhein kata u Laibordedi Tariang 10 run bad u Sanderlang Tariang 14 run. Haduh ba kut ka Evergreen kala kamai 65/10.

U Devention haba ball ruh ula pynpaw iaka jingbit ha kaba ula khyrwit 3 wicket bad ai tang 22 run na ka 4 over kaba la biang pura ia u ban khur ia ka nam man of the match. U Bishal M Sangma ruh ula khur 3 wicket.

Ka jingialehkai haka 23 tarik kan long hapdeng ka Ummulong SC pyrshah iaka Mowkaiaw CYC haka por 9 baje mynstep.