Jop ka Wapungshnong haka 2nd Division football ka EJHDFA

Syllad | The Rising MeghalayaJuly 18, 2025

Ka Wapungshnong SSC kala khur jingjop haka lympung ialehkai 2nd Division Football League haka 17 tarik Naitung. Ar tylli kiwei pat ki jingialehkai kila iakhaid hapdeng Diengshalalu SC pyrshah iaka Khliehmyntriang SCSC bad ka Khliehriat West FC pyrshah iaka Tuberkmaishnong SCC.

Ia kane ka lympung la pyniaid da ka East Jaintia Hills District Football Association (EJHDFA) ha madan artificial turf Diengshynrum, Khliehriat.

Ka namjop ka Wapung Shnong ka long pyrshah iaka Wapungskur SSWO da 1-0. Ia kane ka shikol la thep da u Wanphaibiang Dkhar (20).

Shuwa kane, ka Diengshalalu SC kala iakhaid da 1-1 pyrshah iaka Khliehmyntriang SCSC. Ka Khliehmyntriang SCSC kala ioh shuwa ban thep lyngba u Arun Dkhar (13) bad tang hadien 4 minit bala iaid ka jingialehkai ka Diengshalalu SC kala ioh ban pynphai biang lyngba u Khmihbha Rymbai (17).

Kumjuh ka Khliehriat West FC bad ka Tuberkmaishnong SCC kila iakhaid da 1-1. Ka Khliehriat West FC kala ioh ban thep lyngba u Chanbor Malang (52) katba iaka kol na kaliang ka Tuberkmaishnong SSC la thep da u Coming Dkhar (74).