Jop ka Wapung Shnong, Moolang, Musniang Rim haka 3rd Division ka EJHDFA

Syllad | The Rising MeghalayaSeptember 25, 2024

Ka Wapung shnong, Moolang SC bad Musniang Rim SC kila khur jingjop haka lympung ialehkai 3rd Division Football Tournament kaba pyniaid da ka East Jaintia Hills District Football Association (EJHDFA) kaba long ha madan artificial turf Diengshynrum haka 25 tarik Nailur.

Ka namjop ka Wapung kala wan da ka jingshut tie breaker da 4-3 pyrshah iaka Tongseng Youth SCC. Da kane ka namjop ka Wapung Shnong kala jam sha ka wat kaba ar, ka Round 16.

Ha kawei pat ka jingialehkai ka Moolang SC kala jop da 5-2 iaka Iongkaluh Wahsder SC. Ha kane ka jingiakhun u rangialehkai Moolang, u Faster Rymbai ula khyrwit da hattrick (16, 67, 80+2, sa ar kol la iarap da u Shibunlang Dkhar (32( bad Lambres Dkhar (63).

Arkol na kaliang ka Iongkaluh Wahsder la thep da u Fastly Dkhar (22) bad Diophrin Dkhar (72).

Haka jingialehkai kaba khatduh ka Musniang Rim SC kala pynliem da 2-1 iaka Suchen Lumiarain SC.

Iaki kol jong ka Musniang Rim la thep da u Miki Siangshai (63) bad Shanbormi Dkhar (79). Shikol na kaliang ka Suchen Lumiarain SC la thep da u Areyou Amse (55).