Jop ka Wahsanphaw, Youngstars bad Rymbai haka 3rd Div Football ka EJHDFA

Syllad | The Rising MeghalayaJuly 5, 2025

Ka Wahsanphaw SC Sohkymphor, Youngstars SSC Huroi bad Rymbai SYWO kila khur jingjop haka lympung ialehkai 3rd Division Football League kaba pyniaid da ka East Jaintia Hills District Football Association (EJHDFA) ha madan artificial turf Diengshynrum, Khliehriat.

Haka jingialehkai kaba la long haka 4 tarik Naitung, ka Wahsanphaw SC Sohkymphor kala pynliem iaka Umlawang SC da 3-0. Ia kine ki kol jong ka Wahsanphaw SC Sohkymphor la thep da u Iaibha Miki Talang (41), Dayomiki Lyngdoh (66) bad Iakitlang Lyngdoh (69).

Haka jingialehkai kaba bud ka Youngstar SSC Huroi kala jop da 1-0 pyrshah iaka Mynkre SC, bad ia kane ka kol jong ka Youngstar SSC Huroi la thep da u Different Surong (66).

Ha kawei pat ka jingialehkai ka Rymbai SYWO kala pynrem iaka Sonapyrdi FSC da 1-0 lyngba ka kol ba la thep da u Heijuh-i-por Dkhar (30).