Jop ka Tuber Kmaishnong, Suchen Mulieh bad ka Moopyniein haka 3rd Div Football ka EJHDFA

Syllad | The Rising MeghalayaSeptember 10, 2024

Ka Moopyniein SCSO, Tuber Kmaishnong CSC bad Suchen Mulieh YWSC kila khur jingjop haka jingialehkai 3rd Division Football Tournament kaba pyniaid daka East Jaintia Hills District Football Association (EJHDFA) kaba long ha madan artificial turf ha Diengshynrum kaba long haka 10 tarik Nailur.

Ka namjop ka Moopyniein SCSO kala wan pyrshah iaka Moonongtdu SC da 2-1

Ka Moonongtdu kala ioh ban pynkhih shuwa iaka jar lyngba Paimi Nongtdu (11), katba ka Moopyniein SCSO kala ioh ban pyniakhaid bad pyntam kylla lyngba ki kol kiba la thep u July Siangshai (19) bad Damisooki Lamare (80+1) .

Haka jingialehkai kaba bud, ka Tuber Kmaishnong CSC kala pynliem da 4-0 iaka Mutong SC. Ïa kine ki kol jong ka Tuber Kmaishnong la thep da Laraikut Sana (13, 49), u Arnes Ryngkhlem (14) bad u Kirat Phawa (80).

Haka jingialehkai kaba khatduh jong kane ka sngi, ka Suchen Mulieh YWSC kala pynliem da 3-2 ïaka Lama Youth SSC.

Ki nongthep kol jong ka Suchen Mulieh ki long u Eugeneson Sumer (13, 67) bad u Dominic Suchen (73). Na kaliang ka Lama Youth ia kine ki ar kol la thep da u Banshan Dong (18) bad u Soowanki Suchen (79).