Jop ka Thangskai Tiger bad ka Chiehruphi haka Super Div ka EJHDFA

Syllad | The Rising MeghalayaNovember 20, 2024

Ka Thangskai Tiger SC bad Chiehruphi SYWSC kila khur namjop haka jingialehkai Super Division Football Tournament kaba pyniaid da ka East Jaintia Hills District Football Association (EJHDFA) kaba long ha madan artificial turf ka EJDSA ha Diengshynrum haka 19 tarik Naiwieng. 

Haba phai sha ka jingialehkai ka Thangskai Tiger SC kala pynliem da 2-1 iaka Dhana CSC Iaki ar kol ka Thangskai Tiger la thep da u Pynthymme Rymbai (53) bad Maiki Nongtdu (68). Shikol na kaliang ka Dhana la thep da u Wanlang Massar (60). 

Ka Chiehruphi SYWSC kala jop da 2-1 iaka Khliehriat West YWSC. Ha lyndet kane ka namjop Chiehruphi dei ka jinglah jong u Premi Muksor marwei ban thep ar kol (35, 79). Shikol ka Khliehriat West YWSC la thep da u Moneshwar Mohela shuwa ban kut ka por ialehkai (90+2). 

Hadien ka jingialehkai kaba mar lai sien, ka Dhana SC bad ka Rymbai Shkenshynriah ki don haka kyrdan kaba hakhliehduh da kaba kamai mar 6 poin, hynrei ka Dhana kala tam da ka jingiapher kol, bud ka Sutnga bad ka Thangskai mar 5 poin, Chiehruphi bad ka Ladrymbai B mar 4 poin, ka Rymbai Iawpynsing 2 poin bad ka Khliehriat West kam pat shym la ioh wat tang shi poin.

Haka 21 tarik Naiwieng ka jingialehkai kan long hapdeng ka Ladrymbai B SC pyrshah iaka Rymbai Shkenshynriah haka por 11.45 baje mynstep, ka Rymbai Iawpynsing SC pyrshah iaka Sutnga SSCC haka por 2.15 baje nohphai sngi.