Jop ka Sohmynting haka Independence Day Cup ka WJDSA

Syllad | The Rising MeghalayaAugust 3, 2022

Ka Sohmynting kala jop da 1-0 pyrshah iaka Nangbah Sports Association, katba ka jingiakhun hapdeng ka Sabahmuswang pyrshah iaka Dongmihsngi, ka Royal Pole Mihmyntdu bad Evergreen Mukhla kala wai da kaba iakhaid haka Under-17 Independence Day Cup ka WJDSA.

Haka jingiakhun kaba long ha Kiang Nangbah Stadium haka sngi Balang, iaka shikol ka Sohmynting la thep da u Nidawanchwa Kharlukhi (57) kane ka kol kala neh haduh bala wai ka por iakhun.

Ka jingiakhun hadpeng ka Sabahmuswang pyrshah iaka Dongmihsngi kala wai mar 2-2.

Na kaliang ka Dongmihsngi la thep da u Chanmi Phawa (14) bad u Pyrkhatshaphrang Sumer (43), katba na ka Sabahmuswang la thep da u Tipmiki Shylla (28) bad u Lakhon Dkhar (47) min.

Ha kawei pat ka jingiakhun ka Royal Pole Mihmyntdu kala iakhaid 2-2 pyrshah iaka Evergreen Mukhla. Na ka Evergreen Mukhla la thep da u Threll Dkhar (14) bad Bantei Lamare (42). Katba na ka Rotyal Pole la thep da u Nganpynshongdor Niang (25) bad Dapdor Ymbon (29).

Ka jingiakhun lashai ka sngi kan long hapdeng ka Caroline Colony pyrshah iaka Lutituber Ialong, Dulong pyrshah iaka Sailung Ialong bad ka Lumpariat pyrshah iaka Mulang Ialong.