Jop ka Simi Khongtiang ia nam Best Director ka phlim Ka Chithi haka Prag Cine Awards

Syllad | The Rising MeghalayaFebruary 17, 2024

Ka nongshna phlim na Meghalaya, ka Kong Simi Khongtiang ka la ioh ban rah ia ka nam “Best Director” na ka bynta ka phlim jong ka, “Ka Chithi” ha ka Prag Cine Awards, 2024, North East India.

Ia kane ka lympung sam khusnam la pynlong hapoh Jorhat ha ka 16 tarik Rymphang, 2024.

Ia kane ka phlim jong ka Kong Simi kaba dei ha ka ktien Jaintia la pynrung ha ki lai tylli ki bynta jong ka jingsam khusnam, ka “Best Film”, “Best Actor (Female)” bad “Best Director”.

Kane ka nongthaw phlim kaba dei tang ma ka ha ka karkhana shna phlim na Jaintia ka la ong, “Kane ka dei ka khyllipmat kaba khraw tam na ka bynta ka kynhun jong ka phlim “Ka Chithi”. Ki don bun ki phlim ha ka thain shatei lammihngi kiba la pynrung kyrteng ha kane ka khusnam kaba paw. Nga sngewkmen bad sngewieit halor kane ka bynta”.

Ka la ong ruh ba kum ka Director, kane ka dei ka sien kaba ar ba ka la shah kynthup ha ka jingsam khusnam. “Ngam shym la poi sha ka thong ha u snem 2018, hynrei mynta ka kynti nga la ioh”, ka la bynrap.

Kane ka dei ka khusnam kaba nyngkong na ka bynta ka Kong Simi ha ka lympung sam khusnam shabar ka jylla. Ka Prag Cine Award ka dei ka lympung sam khusnam kaba heh tam ha ka thain shatei lammihngi bad ka jingthmu jong ka ka long ban pynkiew shuh shuh ia ki kam shna phlim bad ban ai jingithuh ia ki riew donsap ha kane ka thain.