Jop ka Shilliang Raij iakhaid ka Mukhla Umlangshor bad ka NSA haka 2nd Div ka WJDSA

Syllad | The Rising MeghalayaAugust 23, 2024

Ka resol haka sngi kaba ar jong ka jingialehkai 2nd Division Football Tournament, ka long ba Shilliang Raij kala khur iaka namjop, katba ka Mukhla Umlangshor bad Nangbah Sports Association (NSA) kila iakhaid haka 22 tarik Nailar.

Kine ki ar tylli ki jingialehkai kiba pyniaid da ka West Jaintia District Sports Association (WJDSA) ha madan Kiang Nangbah Stadium, Jowai.

Haba phai sha ka jingialehkai hapdeng ka Mukhla Umlangshor pyrshah iaka Nangbah Sports Association (NSA), ka jingialehkai kala long kaba iadei bor bad kila iatynjuh mar kylliang ban ioh thep kol bad haduh kaba kut kine ki ar liang mamla kila ioh thep kol mar 3.

Na kaliang ka Mukhla Umlangshor ia kine ki lai kol la thep da Khel Sumer (15), Samuel Shylla (61) bad Ryngkatlang Sumer (81). Katba naka bynta ka NSA la thep da u Teibha Lyngdoh (26), Jubab Pohleng (29) bad Phidalin Dkhar (73).

Haka jingialehkai kaba bud, ka Shilliang Raij kala jop iaka Maitchaphrang Mowtyrshiah da 1-0. Ia kane ka kol la thep da Hamewan Rngad (5).

Haka 28 tarik Nailar ka jingiakhun kan long hapdeng ka Shangpung Moosyiem pyrshah iaka Panaliar haka por 12.00 baje mynsngi, ka Lumpariat pyrshah iaka Lion Sports &Youth Affair haka por 2.00 baje nohphai sngi.