Jop ka samla Chaivalry Lartang ia ka nam Miss Universe Meghalaya 2025

Syllad | The Rising MeghalayaJune 18, 2025

Ka Miss Meghalaya Organisation kaba hapoh ka jingpyniaid ka Meghalaya Tourism Youth Development Society (MTYDS), da ka jingsarong ka la pynbna ia ka samla Chaivalry Lartang kum ka lahduh ha ka jingiakop thei bhabriew ba la tip kum ka “Miss Universe Meghalaya 2025.”

Da kane ka jingjop, mynta ka samla Chaivalry kan ioh ban leit mihkhmat ia ka Meghalaya sha ka jingiakop Miss Universe India 2025.

Ia kane ka jingjied sha ka jingiakop thei bhabriew ha ka jylla la pynlong ha ka 14 tarik Jylliew ha Hotel Vivanta, Khyndailad, Shillong ha ka jingiakhun kaba ia aireng bha hapdeng ki nongwan iashim bynta na kylleng ka jylla Meghalaya.

Ki nongbishar ha kane ka jingiakop ki kynthup ia u Amjad Khan, Director ka Franchise Operations na ka bynta ka Miss Universe India, ka Aqsa Varghese, Miss Universe Kerala 2024; bad ka Irene Dkhar, Miss Tourism India.

Ka Chaivalry, kaba la jop ha ka kyrdan 1st Runner up ha ka jingiakop Miss Meghalaya 2024, kala pynpaw iaka sap, ka jingskhem jingmut bad ka jingitynnad jong ka kaba la pynhun iaki nongbishar.

Mynta kane ka thei bhabriew kan sdang na ka bynta ka jingshah hikai ha Delhi katba ka dang pynkhreh ban iashim bynta ha ka rynsan Miss Universe India 2025.

Na ka liang ki nongpyniaid ki la pynpaw ka jingsnew sarong kaba khraw halor kane ka jingjop jong ka samla Chaivalry da kaba khot ia ka “Ka nongkit khubor ba shisha jong ka jingitynnad, ka sap bad ka mynsiem jong ka Meghalaya.”