Jop ka Risingsun Pasyih Nonglatem haka 3rd Div ka WJDSA

Syllad | The Rising MeghalayaApril 10, 2022

Ka Rising Mukhla, Pasyih CSC bad ka Nonglatem kila khur jingjop haka Third Division Football Tournament- ka 2nd Adelbert Laloo Memorial Trophy kaba pynïaid da ka West Jaintia District Sports Association (WJDSA) kaba long ha Kiang Nangbah Stadium haka sngi Saitjain.

Ka Risingsun Mukhla kala jop pyrshah da 2-0 kol iaka Lumbhahdakha Wahiajer. Baroh ar tylli kine ki kol kila mih haka kylla miet lyngba u Wadshwa Rymbai (60) bad u Rimi Pyrtuh (73).

Haka jingïakhun kaba ar ka Pasyih Cultural and Sports Club kala pynliem da 5-1 kol iaka Nangbah Mooknor.

Ia kine ki 5 kol ka Pasyih la thep mar shi kol da u Hammyllien Dkhar (25), Sakhiatmi Siangshai (30), Shaniah Dkhar (63), Deiwi Rymbai (69) bad u Sambud Dkhar (80). Shikol ban lait brut ka Nangbah Mooknor la thep da u Rilangki Susngi (54).

Haka jingïakhun kaba khatduh ka Nonglatem ka la pynliem 2-0 kol ïaka Mookyrdup. Ia kine ki ar kol la thep Tomi Lamare marwei (7,49) kaba la biang pura iaka Nonglatem ban khur jingjop.

Ka jingïakhun haka sngi Nyngkong kan long hapdeng ka Maitshaphrang Mowtyrshiang pyrshah ïaka Pateiñki Sabah haka por 11.00 baje mynstep, ka jingiakhun ba ar hapdeng ka Madankynsaw Mookyndeng pyrshah ïaka Mupliang haka por 1.00 baje nohphai sngi, ba lai hapdeng ka Madan Thadmuthlong pyrshah ïaka Tpep Pale haka por 3.00 baje janmiet.