Jop ka Nartiang bad ka Grounded haka football ka TSA

Syllad | The Rising MeghalayaJanuary 8, 2025

Ka Madur bad Ryntih Mynsngat kila iakhaid katba ka Nartiang bad Grounded FC kila khur jingjop haka Thadlaskein football League ba la pyniaid da ka Thadlaskein Sports Association (TSA) madan Stadium Wahiajer haka 7 tarik Kyllalyngkot.

Haba phai shaka jingialehkai ka Madur bad ka Ryntih Mynsngat kila iakhaid da mar 1-1. Ka Madur kala ioh ban pynkhih jar haka minit kaba 6 lyngba u Riang Laloo katba ka Ryntih Mynsngat kala ioh ban pynphai haka minit 39 lyngba u Ryntih Shylla.

Haka jingialehkai kaba bud, ka Nartiang kala pynliem iaka Mukhla Veteran da 2-0 lyngba ki kol ba la thep da u Pynkhap Law 38 bad Pyniohlad Bhoi 68.

Ha kawei pat ka jingialehkai ka Grounded FC kala jop iaka Onfroy United da 2-0 bad ia kine ki kol la thep da u Dresionmi Sumer 43 bad Chanborlang Krem 45.

Haka 8 tarik Kyllalyngkot ka jingialehkai kan long hapdeng ka Tyrshang pyrshah iaka Tympang SC Iongshiwiat haka por 9.00 baje mynstep, ka Nongkhroh Sohbar pyrshah iaka Tyllilang-i Moobakhon haka por 11.00 baje mynstep.