Jop ka Mupliang iaka NEAU da 9 wicket haka District Cricket League ka WJHDCA

Syllad | The Rising MeghalayaMay 9, 2025

Ka Mupliang SC kala khur iaka namjop da kaba suk da 9 wicket pyrshah iaka NEAU CC haka jingialehkai District Cricket League kaba pyniaid da ka West Jaintia District Cricket Association (WJHDCA) kaba long ha madan ialehkai ka shnong Khliehtyrshi haka 9 tarik Jymmang.

Ha kane ka jingiakhun ka NEAU kaba la rem iaka toss kala tied shwa ha kaba kala kamai tang 63/10 na ka 14.3 over. U Arman B Marak ula kamai 17 run (khlem out) bad u Alban Presley R Sangma 16 run bad lait na kine ki ar ngut kiba ym don mano mano ba ioh ar dak jingkhien bad saw ngut ki nongtied kila liem khlem kamai run eiei.

Kane ka jinghap kynsan ki wicket ka NEAU ka dei na ka jingialehkai bha u Defender Dhar uba la khyrwit 5 wicket marwei kaba la biang pura ia u ban khur iaka nam man of the match. La kyrshan ruh ia u da u Sandy Kharshandi uba khur 2 wicket.

Haba beh iaka thong kaba 64 run ka Mupliang kala pynkut iaka jingialehkai da 65/1. U Mewan Phawa u la tied 21 run (khlem out) na ki 34 ball ryngkat 2 (4s), u Oniwanker Sna pat u la tied 16 run (khlem out) ryngkat ki 3 (4s) bad u Byforcestar Dhar u la tied 16 run.

Ka Mupliang da kane ka namjop kala wan haka kyrdan kaba ar haka miej iakhein point hadien ka West Jaintia Police kaba tam na ka Net Run Rate. Baroh ar kine ki kynhun na ka thup A kila khur namjop mar saw sien na ka san sien ialehkai. Katba ka NEAU kala jop shisien na ki san sien iakhun.

Ka jingialehkai kaba bud na ka thup B kan long hapdeng ka Phramer CC pyrshah iaka Khliehtyrshi haka 10 tarik Jymmang.