Jop ka Mukhla iaka Salaroh rah syndon iaka (L) Kesilroy Pala Invitation Football Tournament 2023

Syllad | The Rising MeghalayaOctober 13, 2023

Ka Mukhla FC kala jop da 2-0 iaka Salaroh haka jingiakhun final (L) Kesilroy Pala Invitation Football Tournament 2023 kaba dei kaba sien kaba nyngkong bala pynlong ia kane ka tournament da ka West Jaintia District Sports Association (WJDSA).

Ia kane ka final la pynlong la Kiang Nangbah Stadium haka sngi Thohdieng.

U kongsan uba la wan ban sakhi ia kane ka jingialehkai final u dei u Ma Sniawbhalang Dhar Deputy Chief Minister ka Sorkar Jylla uba dei u khun jong u Late Kesilroy Pala haka jingdonlang ki ba haiing hasem nalor u MLA ka Jowai u Ma Wailadmiki Shylla, u Doloi ka Elaka Jowai u Ma Puramon Kynjing, ki dkhot nongkitkam bad nongïalam ka WJDSA kiba kynthup ïa u EMH Passah, u General Secretary u Lammat oo Laloo haka jingïalang kaba la pynïaid da u Vice President WJDSA u Patrick Lamare.

U Primrose Lamat ula kylla long u namtam ha kane ka jingialehkai hadien ba marwei ula thep ia kine ki ar kol kiba la wan haka minit 45’+2 bad 90’+5 kaba la biang pura iaka Mukhla ban khur iaka nam lahduh.  Kane ka jinglah jong u Primrose lehkaibha kala pynlong ia u ban khur iaka nam Man of the Match.

Ka nam best Goal Keeper la ioh khur da u Aibormiki Suchiang.

Da kane ka nam jop ka Mukhla ka la ïoh rah ïaka song pisa ba 5 lak tyngka ryngkat ka trophy, katba kynhun kaba wan ba ar ka la ïoh rah iaka song pisa ba 2 lak tyngka lem ka trophy.