Jop ka Mukhla iaka Mupliang haka sngi sdang ka (L) Kesilroy Pala Invitation Football Knock Out Tournament ka WJDSA

Syllad | The Rising MeghalayaSeptember 2, 2023

Ka Mukhla FC kala jop da 6-1 pyrshah iaka Mupliang haka sngi sdang jong ka (L) Kesilroy Pala Invitation Football Knock Out Tournament 2023 kaba pyniaid da ka West Jaintia District Sports Association (WJDSA) kaba long ha madan Kiang Nangbah Stadium haka sngi Saitjaiñ.

U kongsan uba wan plie ia kane ka tournament u dei u khun jong u (L) Kesilroy Pala, u Ngaitlang Dhar uba dei ruh u MLA barim ka Umroi Constituency haka jingdonlang ki ba haiing hasem, u MLA ka Jowai u Wailadmiki Shylla, u Dasakhiat Lamare MLA barim bad ki nongshah khot sngewbha. La iadonlang u working president WJDSA ma EMH Passah, vice president WJDSA u ma Patrick Lamare, Hony. general secretary u Lammat OO Laloo bad kiwei kiwei.

U Ngaitlang Dhar haka jingkren ula ong ka jingthrang jong ki kum ka iing ban pynmih Tournament haka kyrteng jong u Kpa jong ki, ka long namar ba u Kpa jong ki udei u briew uba ieid bad sngewtynnad iaka kam sports.

Haba phai sha ka jingialehkai, ia ki kol ka Mukhla FC la thep da u Wadajied Ryngkhlem 23′ & 64′, Santi Janai 68′, Timmy Ryngkhlem 79′, Teddy Bang 82′ bad u Player Suna 85′. Shikol na kaliang ka Mupliang FC la thep da u Basuk Khonglah haka minit 45’+2.