Jop ka Mawdieja SC haka football pynmih pisa ka TULBA ban ïarap ïaki longïing ba duk

Syllad | The Rising MeghalayaOctober 21, 2019

SHILLONG: Ka Mawdieja SC kala jop da 2-1 kol ïaka Machine FC haka jingïakhun football kaba shi sngi kaba la tip kum ka One Day Knock Out Football Tournament kaba pynïaid da ka The Ultimate Legend Bikers Association (TULBA), Sohryngkham Unit ha ka sngi Nyngkong.

Ïa kane ka football la pynlong ha Mawdngong, Mawdieja, Sohryngkham ban pynmih pisa ban iarap iaki longiing kiba duk jong ka shnong Sohryngkham bad kiwei bad ha juh kane sngi la rakhe ruh ïaka lyngkhuh sngi iap ba 31 jong u khlawait ka jaitbynriew U Syiem Wickliffe.

U Bah Richard Mawkhiew General Secretary, KSU Nongthymmai Circle uba long kum u kongsan u la iaroh bad ai mynsiem iaka TULBA Sohryngkham Unit ba kala shim ka sienjam kaba bha na ka bynta ban kyntiew iaka imlang sahlang jong ki para doh para snam.

Ha kaba ïadei bad ka jingrakhe ïaka lyngkhuh sngi iap U Syiem Wickliffe, une u nongialam u la ong “haduh mynta ngim pat dei ki nong India ba pura hynrei la shu pynbor ia ngi da ki ktang suloi ban long nong India.”

U Bah Richard u la ong ruh ba ka slogan “We’re are Khasi by blood, Indian by force” ka dei kaba shongnia haduh katta katta namar ki Syiem ka Bri u Hynniewtrelp ki khlem iasoi iaka Instrument of Merger bad ka sorkar India hapoh ka jingialam jong u pandit Nehru kum u Myntri Rangbah.

U la ai mynsiem iaki nongialehkai football namar ba mynta ka la kylla long ka lad ioh kam da kaba pyni nuksa ia ki khlur ialehkai ka jylla kum u Eugenson, Redeem, Aiban, Chesterpaul bad kiwei kiwei ki rangialehkai kiba  mihkhmat iaki club baheh haka ISL.

Ula banjur iaki samla ka thaiñ ban kiar na ka jingmlien ba sniew kum ka jingdih ia u drok, u kynja bad kiwei kiwei ki kynja jingdih pynbuiad ban jop haka jingim.