Jop ka Lumshnong iaka Khliehriat East da ka penalty, rah syndon iaka nam lahduh 2nd Division ka EJHDFA

Syllad | The Rising MeghalayaAugust 18, 2025

Ka Lumshnong YWSC kala pynliem iaka Khliehriat East YWSC da ka jingiashut penalty da 4-3  bad kala ioh rah syndon iaka nam lahduh haka 2^nd Division Football Tournament kaba long ha madan phlang plastik ha Diengshynrum haka 18 tarik Nailar.

Ia kane ka lympung ialehkai la pyniaid da ka East Jaintia Hills District Sports Association (EJHDFA).

Ha kane ka jingiakhun final katkum ka por kaba la buh ka jingiakhun kala wai khlem don mano mano ba ioh pynkhih jar. Hadien bala rah iaka jingialehkai sha extra time ka jingiakhun kala kut da kaba iakhaid. Dei haka jingiashut penalty ka Lumshnong kala lah ban pyntam iaka Khliehriat da 4-3 kaba la biang pura iaka ban rah iaka nam lahduh.

Baroh ar tylli kine ki kynhun haka aiom ialehkai ka ban wan kin ialehkai noh haka 1^st Division Football Tournament.

U Skemborlang Rupai ka Lumshnong ula khur iaka Player of the Match, ka nam Top Scorer: Arlangki Sutnga (Khliehriat West FC), Best Goalkeeper: Bobbyson Nongtdu (Lumshnong YWSC) bad iaka Player of the Tournament la khur da u Rida O Rupai (Lumshnong YWSC).

U  kongsan Grimlang Dkhar bad u symbud kongsan Moses Swer kila sam iaki khusnam haka jingiadonlang Myntri Sorkar Kyrmen Shylla, MDC Sumer Krison Langstang bad MDC Rymbai Khliehriat Violet Lyngdoh, Daloi ka Elaka Narpuh Manbha Kyndoh bad ki nongkitkam bad dkhot EJHDFA.