Jop ka Lumphyrnai Sohphoh da 2-1 iaka Nongkhroh Rim haka Super Division ka TSA

Syllad | The Rising MeghalayaSeptember 2, 2025

Ka Lumphyrnai Sohphoh kala lah ha ka ban khur namjop da 2-1 pyrshah iaka Nongkhroh Rim haka jingialehkai Super Division Football Tournament kaba pyniaid da ka Thadlaskein Sports Association (TSA) kaba long ha madan Wahiajer Multi Sports Complex haka 1 tarik Nailur.

Kane ka namjop ka Lumphyrnai Sohphoh kala wan lyngba ka kol kaba la thep da u Sumar Suting (20) bad Habandajop Khynriam (50). Ia ka shikol ka Nongkhroh Rim la thep da u Robito Nongspung (19).

Hashuwa ka jingiakhun Super Division, ar tylli ki jingialehkai 2^nd Division Football Tournament kila kut noh da kaba iakhaid.

Ka jingialehkai kaba nyngkong hapdeng ka Iongshiwiat pyrshah iaka Mukhla Wahshnong kala kut da 1-1. Na kaliang ka Iongshiwiat ia kane ka shikol la thep da u Elias Lyngdoh (52), katba nakaliang ka  Mukhla Wahshnong la thep da u Heibor Sari (70).

Kawei pat ka jingialehkai hadpeng ka Iawpynsin Wahiajer bad Namdong A ruh kala kut da kaba iakhaid da 1-1. Iaka kol jong ka Iawpynsin Wahiajer la thep da u Markatjuh Dkhar (10), katba ka Namdong A ka lah ha kaban tan kylla iaka jingialehkai hadien 50 minit ba kala shah tam haka kylla lyngba ka kol kaba la thep da u Kriskot Mukhim (60).

Ka jingialehkai haka 2 tarik Nailur, haka kyrdan 2nd Division kan long hapdeng ka Tympang SC pyrshah Myngkrem SC haka por 10.00 baje mynstep, bud sa ka jingiakhun hapdeng ka Maia SC pyrshah iaka Pdienlum SC haka por 12.00 baje mynsngi.

Haka kyrdan Super Division pat ka ka Mukhla Raij SC kan iakhun pyrshah iaka Nongkhroh Krem Kum haka por 3.00 baje nohphai sngi.