Jop ka Khliehriat West, iakhaid ka Thangskai Tiger bad ka Dhana haka Super Div ka EJHDFA

Syllad | The Rising MeghalayaNovember 9, 2023

Ka Khliehriat West YWSC kala pynliem da 3-1 iaka Moolamanoh haka Super Division Football Tournament kaba pyniaid da ka East Jaintia Hills District Football Association (EJHDFA) kaba long ha madan artificial turf ha Diengshynrum haka sngi Palei.

Kawei par ka jingialehkai hapdeng ka Thangskai Tiger SC bad ka Dhana SC kala kut da kaba iakhaid mar 1-1.

Ia ki lai kol ka Khliehriat West YWSC la thep da u Kerlang Tlang 16′, u Embor Lamare 23′, 55′. Shikol ka Moolamanoh SC la thep da u Kiming Dkhar 90’+3.

Haka jingiaiakhun ka Dhana SC bad ka Thangskai Tiger, ka Dhana kala ioh pynkhih shuwa iaka jar lyngba u Wanlam Kassar 7′ bad kane ka kol kala neh tang katto katne por ha kaba ka Thangskai kala tan kylla iaka jingialehkai sha kaba iakhaid lyngba ka kol kaba la thep u Shanlang Rymbai 12′. Kine ki ar kol kila neh haduh bala wai ka por iakhun wat hadien ba kila pyrshang ban ia ioh thep kol.

Haka 11 tarik ka jingiakhun kan long hapdeng ka Rymbai Wahshnong SC bad ka Sutnga SSCC haka por 12.00 baje mynsngi, ka Rymbai Iawpynsing bad ka Shkenshynriah SC haka por 2.00 baje nohphai sngi.