Jop ka Khliehmuchut haka Second Div, ka Mynsngat haka invitation football ka WJDSA

Syllad | The Rising MeghalayaSeptember 9, 2023

Ka Khliehmuchut Shangpung kala buh jaka ialade haka quarterfinal jong ka lympung ialehkai Second Division Football League-6th Debo Shullai Memorial Trophy ba la pyniaid da ka West Jaintia District Sports Asociation (WJDSA).

Kane ka wan hadien ba ka Shangpung Khliehmuchut ka la pynliem iaka Panaliar da 2-0 haka jingiakhun kaba la long ha madan Kiang Nangbah Stadium Ladthadlaboh, Jowai haka sngi Thohdieng.

Ia kine ki ar kol jong ka Shangpung Khliehmuchut la thep da u Rangdajied Sayoo haka 79 bad u Dabiang Law haka 80+3 minit.

Katba haka lympung ialehkai (L) Kesilroy Pala Invitation Football Tournament, u Nidaioh Dhar ula khyrwit da ka hattrick kaba la biang pura iaka Mynsngat FC ba kan khur jingjop da 4-1 pyrshah iaka Mookyndur.

Nalor ka Hat-trick jong u Nidaioh Dhar haka minit 24, 44 & 84, u Army Talang ruh ula ioh ban thep kol haka minit kaba 79. Katba ka shikol jong ka Mookyndur la thep da u Lammida o Dkhar haka minit kaba 41.

Da kane ka namjop ka Mynsngat kala rung sha ka quarterfinal ha kane ka tournament.

Ka jingiakhun mynta ka sngi kan long hadpeng ka Mookyrdup pyrshah iaka Rymbai Shkemshynriah haka por 2 pm, katba ka Second Division pat hapdeng ka Iawmulong Nartiang pyrshah iaka Pynthorlangtein haka por 12 pm.