Jop ka Iawmulong Nartiang iaka Shangpung Khliehmuchut haka 2nd Div ka WJDSA

Syllad | The Rising MeghalayaAugust 29, 2024

Ka Iawmulong Nartiang kala jop da 1-0 iaka Shangpung Khliehmuchut, katba ka Lutituber Ialong kala iakhaid bad ka Risingsun Mukhla da 1-1 haka jingialehkai 2nd Division Football Tournament – 7th Debo Shullai Memorial Trophy kaba long ha ka 29 tarik Nailar.

Ia kane ka lympung la pyniaid da ka West Jaintia District Sports Association (WJDSA) ha madan Kiang Nangbah Stadium.

Ki kol na ka bynta ka Lutituber la thep da u Marbhah Dhar (24) bad na kaliang ka Risingsun Mukhla la thep da u Stopper Bang (49).

Haba phai sha ka jingialehkai ka Iawmulong Nartiang bad ka Shangpung Khliehmuchut, kane ka shikol kaba dei ka kol jop kala wan haka minit kaba 13 bala iaid ka jingiakhun kaba la thep da u Living Suja.

Shuh shuh ka jingiakhun quarterfinal 3rd Division Football Tournament – 4th Adelbert Laloo Memorial Trophy kan long haka lashai ka sngi (30 tarik Nailar) hapdeng ka Riatsaliya pyrshah iaka Newhill haka por 12.30 mynsngi.

Ka jingiakhun quarterfinal kaba ar kan long hapdeng ka Lumpyrtuh Mihmyntdu pyrshah iaka SCSC Nonglatem haka por 2.0 baje nohphai sngi.