Jop ka Heibor Iong-i, Thadmusem bad ka Laru haka football ka TSA

Syllad | The Rising MeghalayaSeptember 5, 2025

Ka kynhun ialehkai ka Heibor Iong-i, Thadmusem bad ka Laru ki la lah ha kaban khur iaka nam jop haka jingialehkai Super Division bad 2nd Division Football kaba pyniaid da ka Thadlaskein Sports Association (TSA) kaba long ha madan Wahiajer Multi Sports Complex haka 4 tarik Nailur.

Ka namjop ka Heibor Iong-I FC kala wan pyrshah iaka Mookyndur SC da 2-1 haka jingialehkai haka kyrdan Super Division. Ha kane ka jingialehkai ka Heibor Iong-i kala tam shuwa shakhmat lyngba ka kol kaba la thep da u Baiahun Tariang (11′) ia kaba la lah ban tan kylla pat da u Careful Suting (35′) na ka bynta ka Mookyndur.

Dei haba la wan ban bteng biang iaka jingialehkai haka kylla miet ka Heibor Iong-i kala kyntiew iaka rukom ialehkai ka jong ka ban iakhun tyngeh ha kaba ki player jong ka kiba thrang shisha ban khur iaka nam jop pyrshang har rukom ki jingpyrshang bad u Emlang Shadap uba la ioh iaka kabu ksiar haka minit kaba 58′ ula lah ha kaban pynkhih ir iaka jar bad kane ka kol kala pynlong iaka Heibor Iong-i ban khur iaka namjop.

Haba phai sha ka jingialehkai haka kyrdan 2nd Division, ka Thadmusem kala pynliem da 3-0 iaka Lad Mukhla. U Tony Dkhar ula kylla long u namtam ha kaba marwei ula khyrwit ar kol (27′, 68′) bad bynrap shikol na u Kamni Dkhar (10′).

Shuh shuh ha kawei pat ka jingialehkai ha kane ka juh ka kyrdan, ka Laru FC kala jop da 2-1 iaka Moodop Nartiang. Ha kane ka jingiakhun ka Moodop kala tam shakhmat lyngba ka kol u Fredy Khynriam haka minit kaba 6′ bala iaid ka jingiakhun, hynrei ka Laru kaba wan nadien kala lah ha kaban tan kylla iaka jingiakhun sha kaba iakhaid haka minit kaba 61′ lyngba u Bahnah Suting bad pyntam kylla pat lyngba u Rowelson Langshiang (67′) kaba la biang pura iaka ban kan khur iaka namjop.

Haka 5 tarik Nailur ka jingialehkai 2nd Division ka Thadmynri kan iakhun pyrshah iaka Lumkynsaw haka por 10.00 baje mynstep, pynbud sa ka jingialehkai hapdeng ka Maskut pyrshah iaka Namdong-A haka por 12.00 baje mynsngi.