Jop ka Evergreen SC & CC da 63 run pyrshah iaka Khimusniang haka District Cricket League ka WJHDCA

Syllad | The Rising MeghalayaMay 6, 2025

Ka kynhun ialehkai ka Evergreen SC & CC kala khur iaka nam jop da 63 run pyrshah iaka Khimusniang haa jingialehkai District Cricket League kaba pyniaid da West Jaintia Hills District Cricket Association (WJHDCA) kaba long ha madan Khliehtyrshi haka 5 tarik Jymmang.

Ka Evergreen haba tied nyngkong ha kane ka jingialehkai kaba la pynduna over, kata 20 over kala kamai da 184/6.

U Dinandoo Tariang ula kylla long u namtam ha kane ka jingialehkai ha kaba ula lehkai bha haka bat bad ball kumjuh. Ula kamai 51 run bad neh haduh ba kut khlem liem bad ula khur ruh 4 wicket bad ai tang 5 run na ka 4 over kaba ula ball. Kane kala biang pura ia u ban khur iaka nam man of the match. Ula ioh ruh ka jingkyrshan jong u Sainborlang Gadew uba la tied 33 run.

U KeniteStar Bareh bad u Lumporlan Passah ki la ioh khur mar ar wicket na kaliang ki nongkawang ball ka Khimusniang.

Ka Khimusniang haba beh iaka thong kaba 185 run kam shym la ioh iaka nongrim kamai run kaba skhem bad haka por ba ka dang kamai tang 49 run kala liem 5 wicket. Dei haba mih madan u Yoomi Patweth ula seng iaka nongrim kamai run da kaba kamai 42 run na ka 20 ball bad ula liem ha u Dinando haka 15.4 over. Hadien kane u Ribetroy Bareh bad u Rishot Bareh kila pyrhsang lem ban pynbha iaka jingkamai run ka kynhun, pynban tang hadien 2 over u Rishot ula liem noh da 13 run bad u Ribetroy ula kamai 15 run khlem liem kaba la pynpra noh iaka jingialehkai paralok jong ki bad ka jingialehkai ruh kut artad da 121/8.

Nalor u Dinando, u Micker Marngar ula khur 2 wicket bad u Lodumaitphang Khonglah u la ioh 1 wicket.