Jop ka Demthring 10-0 iaka Sailung Ialong, pynliem ka Wahiajer 4-0 iaka Mukhla Raij haka Super Division ka WJDSA

Syllad | The Rising MeghalayaNovember 15, 2024

Ka Demthring SC kala jop kput haduh 10-0 pyrshah iaka Sailung Ialong, katba ka Wahiajer kala pynliem da 4-0 iaka Mukhla Raij haka jingialehkai Super Division Football Tournament kaba pyniaid da ka West Jaintia District Sport Association (WJDSA) kaba long haka 15 tarik Naiwieng.

U Phang Sumer ka Demthring ula khyrwit da ka hattrick lyngba ki kol kiba ula thep haka minit kaba 13, 20, 44 & 51, ar kol la thep da u Marshial Nongrum (19, 49), Justerwell Gham (57), Willson Dkhar (75), Jendeng Mukhim (76) bad Ksankupar Khongmalai (80).

Hashwa kane ka Wahiajer kala pynliem iaka Mukhla Raij da 4-0. Iaki kol jong ka Wahiajer la thep da u Riburom Jat (7), Pynkhreh Talang (71), Nicky o chwa Pakma (77) bad Niwan o Gatphoh (87).

Lashai ka sngi 16 tarik Naiwieng kan don ka jingialehkai final jong ka 1st Division Football Tournament – 12th Chatister Kharkongor Memorial Trophy hapdeng ka Chutwakhu pyrshah iaka Mooknor Thadmuthlong SC haka por 1.30 baje nohphai sngi.

Ka Super Division kan bteng biang haka 18 tarik Naiwieng ka jingialehkai kan long hapdeng ka Shangpung Lumiawmushai pyrshah iaka 7 Wasa haka por 11.00 baje mynstep. Ka Ladthadlaboh pyrshah iaka Nangbah Mulang haka por 2.00 baje nohphai sngi.