Jop ka Amlarem haka Super Div, ka Samanong, Syntong haka Lower Div ka ASSA

Syllad | The Rising MeghalayaDecember 2, 2024

Ka Amlarem SCC kala khur nam jop haka Super Division, katba ka Syntong Welfare, Samanong SC, kila jop haka Lower Division Football Tournament ba la pyniaid da ka Amlarem Sub-Divisional Sports Association (ASSA).

Baroh ar tylli kine ki kyrdan ialehkai football kila long ha madan Mini Stadium Ladjaplem haka 2 tarik Nohprah.

Haba phai sha jingialehkai ka namjop ka Amlarem SCC kala wan hadien ba kala lah ban pynliem da 2-1 Dongmihsngi Mupyut. Na kaliang ka Amlarem SCC la thep da u Tip Rasmut (5) bad u Puson Rymbui (78), katba iaka kol jong ka Dongmihsngi Mupyut la thep da u Elas Dkhar (15).

Haba phai shaka Lower Division, ka Syntong Welfare kala jop iaka Iaikyntiew Pamtbuh da 3-0. Ia kine ki kol jong ka Syntong Walfare la thep da u Kupar Langshiang (3), Emi mylliem (28) bad Manshwa Langshiang (30).

Haka jingialehkai kaba bud, ka Samanong SC kala pynliem da 2-1 iaka FYC Amtapoh. Iaki kol jong ka FYC Amtapoh la thep da u Iban Bareh (17), katba iaki kol jong ka Samanong la thep da u Menot Maner (52) bad Iarap Suting (57).

Katba ka jingialehkai hapdeng ka EYC Amjalong pyrshah iaka Mawlong SSC kala kut da ka jingiakhaid mar 1-1. Iaka kol jong ka Amjalong la thep da u Jovian Lynthong (4) bad iaka Mawlong ka thep da u Synchetmon Lamat (17).