Jop bun kol ka Pammanik haka Third Div ka WJDSA

Syllad | The Rising MeghalayaAugust 19, 2024

Ka Pammanik kala jop bun kol da kaba khyrwit haduh 7-0 pyrshah iaka Mustem East haka jingialehkai Third Division Football kaba pyniaid da ka West Jaintia District Sports Association (WJDSA) kaba dang iaid shait shait mynta.

Ha phai sha ka jingialehkai haka 17 tarik Nailar ha madan Kiang Nangbah Stadium, ka Pammanik tang hadien 12 minit bala iaid ka jingialehkai kala khyrwit 2 kol ban ban lyngba u Shanbait Pakma (10, 12), shikol la thep da u Jamris Talang (21). Ha ka kyllamiet u Bestmiki Talang (40), Shanbor Talang (62, 68) bad u Jamris ula thep iaka kol kaba ar jong u haka minit kaba 64. Kane ka jingthep bun kol ka Pammanik kala pynlong iaka Mustem East ban jem khnap ha kane ka jingiakhun ha kaba kam lah satia ban khie khlieh bad hap ban hun ban mad iaka namrem kaba bunkol.

Haka jingialehkai kaba bud, ka Mookaswan Dongwah kala jop iaka Phramer da 3-1. Iaki kol jong ka Mookaswan Dongwah la thep da u Emi ianga Phawa (43, 54), u Kermi Shylla (57). Katba iaka kol jong ka Phramer la thep da u Phomi Tang (36).

Ha kawei pat ka jingialehkai ka Iooksi Youth Welfare kala jop iaka Madanthad Muthlong da 2-0 bad ia kine ki kol jong ka Iooksi Youth Welfare la thep da u Banpynroi Tang (42) bad u Sammaia Sumer (70+1).

Kane ka tournament kan jam noh artad sha ka wat kaba ar bad kaba sah jong ki jingiakhun na ka wat kaba nyngkong kan long sa ka 19 bad 20 tarik Nailar.