Jop bun kol ka Dongmihsngi iaka Pdienlum haka TSA Football League

Syllad | The Rising MeghalayaJanuary 11, 2025

Ka Dongmihsngi kala jop da 6-0 pyrshah iaka Pdienlum, ka Lewa FC kala jop iaka Iawpynsin Wahiajer bad ka Larnai bad Square Tiger kila iakhaid haka Thadlaskein Sports Association Football League kaba long ha madan ialehkai ka Wahiajer Stadium haka 10 tarik Kyllalyngkot..

Ka jingiakhun hapdeng ka Larnai bad Square Tiger kala kut noh khlem don mano mano ba lah ban thep kol.

Haka jingialehkai kaba bud, ka Lewa FC kala pynliem iaka Iawpynsin Wahiajer da 2-0 bad ia kine ki kol la thep da u Hao Pyrtuh (7) bad Chanlang Sari (37).

Ha kawei pat ka jingialehkai ka Dongmihsngi kala pynrem da 6-0 iaka Pdienlum. Ia kine ki kol la thep mar shikol da u Hamehi Nongrum (23), Lamphrang Dkhar (27), Sooki Lamare (40), Damonmi Kyndiah (49), Stevenson Phawa (57), Sylvester Rymbai (67).

Haka 11 tarik Kyllalyngkot ka jingialehkai kan long hapdeng ka Madur pyrshah iaka Madansynrang haka por 10.00 baje mynstep, ka Laru pyrshah iaka Myngkrem haka por 12.00 baje mynsngi bad ka Niriang pyrshah iaka Ladmukhla haka 2.00 baje nohphai sngi.