Jingpynbeit iaid kali namar ka Meghalaya Games ha Jowai
Namar ka jingpynlong ia ka lympung ialehkai Meghalaya Games ka ban long naduh ka 19 haduh ka 25 tarik Kyllalyngkot ha Jowai bad ki jaka ba marjan, ka tnad pulit ka Jylla ka la pynbeit ha kaba iadei bad ka rukom iaid kali khnang ba kan ym ktah ia ka leit ka wan jong ki kali hapoh ka district.
Katkum u kyrwoh ba la pyllait ha ka 17 tarik Kyllalyngkot, ha ka 19 tarik kan don ka jingwan poi jong ki nongialehkai/nongiashim bynta ia kiba yn pdiang ha Soomer. Nangne kin leit ter ter sha Mihmyntdu, Kiang Nangbah College, Jowai Polytechnic, Salaroh Road, Pohhali, Dulong, Kdoh Hati, Iongpiah, Mission Compound, Chutwakhu, Jrisalein Junction, bad kin pynkut ha Mynthong. Yn ym shah rung ia ki kali naduh ka por 9 baje mynstep ter ter na lad Lymkyrwiang sha lad Iongpiah bad lad Kdoh Hati.
Ka tnad pulit ka pyntip ruh ba la khang ban pynieng kali ha shilynter ki rud surok ha ka por ba kine ki nongialehkai ki dang don ha ka jingiaid lynti ka jong ki.
La kyrpad ruh ia ki nongshong shnong ka thain Mynthong bad kiwei pat ba kin kiar na ha kaba iadei bad ka leit ka wan ka bym da donkam lyngba ki kali ha ka por ba dang pynlong ia ka prokram lait noh tang ha ki khep kiba donkam kyrkieh.
Ka jingialang plie ia kane ka lympung ialehkai 6th Meghalaya Games kan long ha ka 21 tarik Kyllalyngkot ha Wahiajer Multi Sports Complex. Yn ym shah rung ia ki kali heh na Ummulong ter ter sha Wahiajer Stadium naduh ka por 8 baje mynstep. Nalor kata la khang pyrshah ruh ban pynieng kali harud surok ha ka por ba kane ka prokram ka dang iaid shakhmat.
La kyrpad ruh ia ki Rangbah Shnong jong ki shnong kiba don ha kine ki jaka kumjuh ia ki paidbah nongshong shnong ba kin ai ka jingiatreilang ha kaba iadei bad kine ki jingpynbeit.
Facebook
Instagram
Youtube
Twitter
Leave a Reply