Jem khnap ka Lumiawmuchai haka Ladthadlaboh, jop ka Nangbah Mulang iaka 7 Wasa haka Super Division WJDSA

Syllad | The Rising MeghalayaNovember 25, 2024

Ka Lumiawmuchai Shangpung kala jem khnap hakhmat ka Ladthadlaboh ha kaba kala shahrem noh haduh 12-0, katba ka Nangbah Mulang kala jop da 3-0 pyrshah iaka 7 Wasa ka lahduh mynshem haka Super Division Football Tournament kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka 25 tarik Naiwieng.

Ha lyndet kane ka jingjop ba bun kol ka Ladthadlaboh kala wan lyngba ka hattrick u Rangdajied Sayoo (10, 31, 58), mar ar kol na u Banteilang Shylla (25, 53), Buromlangki Salahe (42, 86), Samuel Phawa (76, 77), Sanki Langstang (21), Medonhi Salahe (49) bad u Jervisly Rymbai (84).

Ka namjop ka Nangbah Mulang pyrshah iaka 7 Wasa kala wan lyngba ka hattrick u Niponghi Sumer (23, 26, 31). Ka 7 Wasa da kane ka namrem kala hiar sha ka kyrdan kaba saw da kaba kamai 8 poin na ki 6 sien iakhun.

Ka Nangbah Mulang kala bat iaka kyrdan kaba hakhlieh duh haka miej iakhein poin da 16 poin ha kaba kala iakhaid shisien na ki 6 tylli ki jingialehkai.

Ka Ladthadlaboh, Demthring bad Wahiajer kila kamai mar 10 poin, Ka 7 Wasa United 8 poin, ka Mukhla Raij 5 poin, ka Shangpung Lumiawmushai 3 poin. Katba ka Sailung Ialong khlem lah satia ban kamai wat tang shi poin

Haka 27 tarik Naiwieng ka jingialehkai kan long hadpeng ka Mukhla Raij vs Lumiawmuchai haka por 11.00 baje mynstep ka 7 Wasa United vs Demthring haka por 2.00 baje nohphai sngi.