Jan shah ban ka kali ha surok NH 6 naka jingtwa khyndew lait thaw ki briew

Syllad | The Rising MeghalayaMay 31, 2025

Lai ngut ki briew kila lait thaw na ka jingma jingmynsaw hadien ba kawei ka kali kala jan shah ban bad shah rong haka khyndew bad ki maw ba la twa na u lum haka janmiet jong ka 31 tarik Jymmang ha surok bah NH6 ha East Jaintia Hills.

Kane ka jingjia twa khyndew kala jia haka shnong Wah Koh haka por kumba 6:30 janmiet. La iathuh ba kynsan la twa u lum bad ka khyndew bad ki maw kila ban ia kane ka kali kaba dei ka Maruti Swift kaba don ia u number ML 04 C 9838.

Ha kane ka por ba twa u lum ki don lai ngut kiba shong haka kali, hynrei donbok kila lait naka jingmynsaw.

Kane ka jingtwa khyndew ha Wah Koh kala wanrah iaka jingsahkut kali ha baroh arliang ka surok bah bad ka jingpynkhuid iaka khyndew bad ki maw ka dang iaid shakhmat.

Ka jingther jur u slap sha ka thain East Jaintia Hills kala pynlong iaka khyndew ban shong synjor bad wanrah ka jingtwa bun jaka.