Jam noh ka 3rd Div ka EJHDFA sha ka quarterfinal

Syllad | The Rising MeghalayaOctober 7, 2024

Ka lympung ialehkai 3rd Division Football Tournament ka East Jaintia Hills District Football Association (EJHDFA) kala jam noh sha ka quarterfinal bad ka jingialehkai kan sdang naduh ka 9 tarik une u bnai ha madan artificial turf Diengshynrum, Khliehriat.

Haba phai sha ka jingialehkai kaba khatduh jong ka round-16, ka Dkhiah West SC kala pynliem iaka Suchen Mulieh YWSC da 1-0. Ia kane ka shikol jong ka Dkhiah West la thep da u Synran langmiki Phawa (80+2).

Haka jingialehkai kaba bud, ka Lumshnong YWSC kala pynliem da 2-1 iaka Moolang SC. Iaki kol jong ka Lumshnong la thep da u Demi Khonglah (16) bad Shkemborlang Rupai ( 40+1). Katba iaka shikol jong ka Moolang la thep da u Refine Dkhar (80+4).

Haka jingiakhun kaba khatduh, ka Lakadong Ummat SCC kala jop da ka tie breaker da 2-0 iaka Musniang Rim SC. Kine ki ar liang haka jingialehkai katkum ka por bala buh kila iakhaid da 1-1. Na kaliang ka Lakadong Ummat la thep da u Nineky Suchen (40) bad iaka kol jong ka Musniang Rim la thep da u Niki Dkhar (61).

Haka 9 tarik Risaw ka jingiakhun quarterfinal kan long hadpeng ka Wapungskur SSWO pyrshah iaka Moopyniein SCSO haka por 12.30 baje nohphai sngi, ka Ratacherra CSC pyrshah iaka Tuberkmai Shnong haka por 3.00 baje nohphai sngi.