Jah u samla ba thmu leit bylla sha sor Shillong

Syllad | The Rising MeghalayaMarch 17, 2021

Uwei u samla ïa uba la tip kyrteng kum u Hammut-i Sungoh 20 snem rta na ka shnong Mynska, West Jaintia Hills District ula jah rngai naduh ka 16 tarik une u bnai bad khlem wan phai ïing shuh.

U mama jong une u khynnah u ma Kenny Paul Sungoh ula ïathuh ba une u khynnah haka 16 tarik une u bnai haka por 7.00 baje mynstep ula mih nala shnong Mynksa ban leit ïakynduh ïa u mama trai ha Phramer da ka jingthmu ban leit sha sor Shillong ban bylla.

U ma Kenny Paul Sungoh ula ïathuh ba u mama trai jong u, ula pynbeit ban wan shaw ïa Hammut-i ha Phramer na Phramer, pynban kine ki ar ngut kim shym la iakynduh.

La iathuh ba mama jong u Hammut ula poi ha Phramer haka jaka ba la iakut bad ula ap katno katno, une u Hammut ula khlem poi satia.

Na kaliang kiba haiing kila dep ujor ha Phramer Police Traffic Cell halor kane ka jingjah une u samla.

Kiba haiing ki la kyntu ia ki paidbah ba lada don mano mano ba ïohi ne lap ïa u Hammut-i ban pyntip ne phone ha une u number 9366161460.