Iohkem ki pulit ia 2 ngut ba thmu lute bad dung ia u nongiaid lynti ha Nongrim Hills

Syllad | The Rising MeghalayaJune 7, 2025

Ki pulit ka Laitumkhrah Police Station haka sngi Thohdieng ki la ioh ban kem noh ia arngut ki nonglute katba ki dang pyrshang ban lute bad dung ia uwei u nongiaid lynti hapoh Nongrim Hills.

U Superintendet of Police ka District, u Bah Vivek Syiem u pyntip ba kine  ki arngut ki nonglute ki dei kiba la tip kyrteng kum u Kitbok Thabah (27) na Golflink bad u Melvin Tongwah (22 snem rta) na Lumshyiap, East Khasi Hills.    

“Hadien ba la ioh pdiang ia kiba bun ki jingujor na ki nongleit nongwan halor ka jingshah lute ha ki arngut ki briew ki bym lah ban ithuh kiba wan da ka scooty rong iong, kumta na ka liang ka Special Team napoh Laitumkhrah Police Station hapoh ka jingialam ka Officer Incharge Insp Lily Nongkhlaw lem bad katto katne ki riew paidbah ki la ioh ban bat noh ia kine ki arngut ki runar kiba wan da ka scooty rong iong najan NEC Nongrim Hills katba ki dang thmu ban lute na uwei u nongiaid lynti da kaba dung ruh ia u da u screwdriver na ki bynta ka kpoh ha ka por kumba 8.10 mynmiet.

U la pyntip ruh ba artylli ki case la register pyrshah ia ki hapoh Laitumkhrah mynta u snem namar ka jingdonkti ha ki artylli ki jingjia kam lute, kata kawei kaba la jia ha ka 10.04.2025 ha ka por 8.30 mynmiet hajan Bawri Mansion ha kaba ki la ioh ban lute haduh T.19,000, katba kawei pat ka jingjia ka dei kaba la jia ha ka 3.06.2025 ha ka por 7 baje janmiet hajan Nagaland House ha kaba ki la ioh ba lute T.5000.

Nalor kata la ioh jingtip ruh ba kine ki runar ki la leh ia kiba kum kine ki kam pyntriem ia kiba bun ngut ki briew hynrei ki bym shym la wan shakhmat ban pyntip.

U la iathuh ruh ba u Melvin Tongwah u dei uba la shah kem teng mynta u snem namar ka jingdonkti ha kaba lute na uwei u briew ha ka thain Polo ha kaba la kem ia u da ki pulit ka Pastuer Beat House.