Ioh waheh chnong thymmai ka shnong Bakur

Syllad | The Rising MeghalayaDecember 1, 2022

U Ma Wespar Lamin ula shah jied kum u waheh chnong thymmai ka dorbar shnong Bakur na ka bynta ka samoi treikam jong u snem 2022-24.

Ia kane ka jingjied waheh chnong la pyniaid da u Dolloi ka Elaka Nongtalang Ma Chui Pohlynjar ryngkat ka jingiadonlang ki ophisar ka Jaintia Hills Autonomous District Council (JHADC) haka 30 tarik Naiwieng 2022.

Ha kane ka jingjied waheh chnong thymmai ki don ar kiba iakhun ia kane ka kam kiba kynthup ia u waheh chnong barim u Ma Daniel Khongsit bad u Ma Wespar Lamin.

U Dalloi ula pynbna ba u Ma Wespar Lamin ula shah jied kum u waheh chnong hadien ba ula ioh 455 vote na ki 764 ngut ki nongshong shnong kiba wan jied ne thep vote.

Na ka liang u Waheh Chnong thymmai u la pynpaw iaka jingsngewnguh iaki nongshong shnong ka Bakur kiba jied bad ai ka jingshaniah ba un kit iaka kam Waheh Chnong ka shnong Bakur. Ula kyntu nongshong shnong naduh ki khynnah ki samla, ki longkmie bad ki rangbah ba don hapoh ka shnong ban iatrei lang bad ban pynneh iaka jingiatylli ka shnong khnang ba yn lah ban wanrah iaka roi ka par, ka suk ka sain hapoh ka shnong ka thaw.