Ioh sei ka SDRF iaka met u ophisar Agriculture ba shah rong ha ka wah Ganol

Syllad | The Rising MeghalayaAugust 6, 2025

Ka kynhun na ka State Disaster Response Force (SDRF) ha ka 6 tarik Nailar ki la ioh ban sei ia ka met jong u ophisar ka Tnad Agriculture u Teseng M Sangma na Banseng Wari kaba don sha ki bynta ba sha them jong ka wah Ganol.

Haba bteng ia ka jingwad naduh ka por mynstep, ka kynhun SDRF ka la iakynduh ia ka jingeh ban ioh sei ia ka met jng une u ophisar ba la khlad noh wat la ki la lap ia ka namar ka jingsahkut hapdeng jong ki mawbah kiba don ha kane ka wah kaba khlain bad kaba buh jingma ia ki dkhot ka kynhun.

Hynrei, ha kaba khatduh la ioh ban sei noh ia kane ka met na kane ka wah da kaba bud ia ka lynti jong ka wah sha ki bynta ba sharum da kaba pyndonkam da ki tyllai haduh ban da lah ban sei sharud jong ka wah.

Na ka liang u Director ka Civil Defence u MK Sangma ruh u la iashim lang ha katei ka jaka da kaba ai ruh ka jingbthah sha ki dkhot ka SDRF ha kaba sei ia kane ka met.

Lah ban kdew ba ia ka met jong une u ophisar ba la khlad noh la lapdien na katei ka jaka hadien saw sngi ba la pynlong ia ka jingwad da ka kynhun SDRF bad kiwei pat ki Tnad nalor ki volunteer kiba dei ki trai shnong.