Ioh rah ka Lamin XI bad Padu Utd iaka nam lahduh haka Upper bad Lower Div ka ASSA

Syllad | The Rising MeghalayaFebruary 6, 2025

Ka Lamin XI SCC bad Padu United kala iohrah iaka nam lahduh haka Lower Division bad Upper Division Football League kaba pyniaid da ka Amlarem Sub Divisional Sports Association (ASSA) kaba long ha madan ialehkai ka shnong Jarain haka 5 tarik Rymphang.

Ka namjop ka Lamin kala wan haka Upper Division da kaba pynliem iaka Sohlawiat SC da 5-3 lyngba ka jingiashut tie breaker hadien ba ka jingiakhun haka por ba la buh kala kut noh da ka jingiakhaid kaba mar 1-1.

Shuwa kane ka jingshut tie breaker ka jingialehkai haka por kaba la buh ka kol ka Lamin XI SCC la thep da u Lakhon Lamin (40) katba iaka kol jong ka Sohlawiat la thep da u Lapynbiang Khonglah (80).

Ka Padu Utd kala ioh rah iaka Lower Division hadien ba kala pynliem da 1-0 iaka Pada Mawsku. U Banjop Pohlong (44) ula thep ia kane ka kol jop kaba la biang pura iaka Padu United ban rah iaka nam lahduh.

Ka Lamin IX SCC ka lahduh haka Upper Division kala ioh rah iaka song pisa kaba 60 hajar tyngka katba ka Sohliwiat kaba wan ba ar kala ioh iaka song pisa kaba 30 hajar tyngka ryngkat ka trophy. Ka Padu United ka lahduh haka Lower Division kala ioh iaka song pisa kaba 40 hajar tyngka katba ka Padu Mawsku kala ioh iaka song pisa kaba 20 hajar tyngka ryngkat ka Trophy.

Haka Lower Division iaka nam Top Scorer la ioh da u Banjop Pohlong, ka nam Best Goalkeeper Diborlang Langshiang bad ka nam Man of the Match la ioh da u Pynskhem Mukhim baroh kidei na ka Padu United.

Haka Upper Division iaka nam Top Scorer la ioh da u Fullme Khonglah Sohliwiat SC, ka nam Best Goal keeper Laiky Khonglah na Lamin XI bad ka nam Man of the match la ioh da u Lakhon Lamin na Lamin XI.