Ioh pyllait im 10 ngut ki nongrep naka jingshlei um ha wah Myntdu

Syllad | The Rising MeghalayaMay 27, 2020

Haduh 10 ngut ki nongrep kiba na Ialong bad kiwei ki shnong kiba la sahkut ha Wah Myntdu naka jingshlei um haka sngi ba Ar la ioh ban pyllait im da ka kynhun State Disaster Response Force (SDRF), Search and Rescue Team jong ka Meghalaya Fire And Emergency Services, ka kynhun u ma Chibor Wahlang, u nongialehkai Adventure Sports bad ka kynhun pulit jong ka District.

Ka Dorbar Shnong Ialong kala pynpaw ka jingsngewnguh iaka bor synshar district naduh u DC, SP, OC Phramer, SDRF, u bah B. Warjri, District Home Guards Commandant, West Jaintia Hills, Search and Rescue Team jong ka Meghalaya Fire And Emergency Services, ka kynhun u ma Chibor Wahlang kiba la treishitom ban iarap ia kine ki nongrep ban sahkut sha shilliang ka Wah Myntdu ban leit shaw iaki da ka lieng.

Ka dorbar shnong Ialong kala ong ban a kane ka jingshlei um la jan baroh ki hali ki pynthor ha par Myntang bad Myntdu kila shah ktah namar ba kala dei ka aiom rep, bun ki kor lur kila sniew bad ki lyngkha kila dap da ki shyiap ki maw nalor ka jingduh iaki jingri jingdup.

Ka Dorbar Shnong kala kyntu iaka Sorkar ba kan pynioh ki lad iarap sha ki Nongrep bad ki jaka rep ba shah ktah, iaki nongshong shnong kiba hap ba ur ki kynroh ha ki iing jong ki bad ki surok shnong kiba la shah ktah haka jingeh ka um ha Wah Myntdu bad Wah Myntang.

Ki nongshong shnong kila ai khublei ruh ia u Waheh Shnong, Secretary shnong bad ki khun ki shnong Ialong kiba la treishitom ban iarap bad shim jingkhien bad ban iarap iaki nongrep ka shnong.