Ioh pdiang u Dr. Heipor Uni Bang ia ka khusnam National Teachers’ Award 2025

Syllad | The Rising MeghalayaSeptember 6, 2025

U Dr. Heipor Uni Bang, Principal bad nongseng KB Memorial Secondary School, East Jaintia Hills, Meghalaya, u la shah pynkup burom da ka khusnam National Teachers’ Award 2025 ha ka 5 tarik Nailur.

U Dr Heipor u dei napdeng ki 45 ngut ki nonghikai na kylleng ka ri India kiba la shah pynkup burom ha ka President Droupadi Murmu ha ka jingialang kaba la long ha Vigyan Bhawan, New Delhi, ha ka jingrakhe ia ka sngi kyrpang jong ki Nonghikai.

Ka jingithuh ia u Dr Bang ka pyni ia ka jingaiti ka jong u ha ka pule puthi, ka jingwad bniah ha kaba iadei bad ka mariang bad ka jingshakri ha ka imlang sahlang. Kum u riew shemphang ha ka pule puthi, u la pyndep ia ka PhD ha ka Environmental Management na William Carey University, Nongmensong lyngba ka thesis halor ka phang, “Ki jingeh bad ki lad ki lynti jong ka jingpynkhuid ia ki jaboh jabain jong ka East Jaintia Hills District ka Meghalaya.”

U la thoh ruh ia buntylli ki jingthoh wad bniah, kynthup ia kiba la pynmih ha ka International Journal of Research Education and Scientific Methods (2021), bad ia ka International Journal of Ecology and Environmental Science (2020). U la thoh ruh ia ki kot pule ha ka ktien Khasi ba la hikai haduh ka klas IV bad u ju pynthymmai man ka por ia ki kot jingtip kyllum jong ka skul ban kynthup ia ki jingtip kiba iadei bad ki kam jong ka District bad ka Jylla.

U Dr Bang u la sdang ia ka kam hikai ha u snem 2000 hadien ba u la pyndep ia ka MSc ha ka Botany na ka skulbah North-Eastern Hill University (NEHU). U la hikai ha Flower Secondary School, Khliehriat, bad Rymbai Presbyterian Higher Secondary School hashwa ba un seng ia ka KB Memorial Secondary School ha u snem 2013 ban pynbiang ia ka jingdawa ha ka imlang sahlang ban ioh ia ka skul phareng kaba duna dor.

Hapoh ka jingialam ka jong u ka skul ka la kiew sted ha ka liang ka pule puthi, ka sport bad ki bynta kiba iadei bad ka kolshor bad kaba la wan ba ar ha ka State Subroto Mukherjee Cup (Under-14 Boys) ha u snem 2023 bad 2025, bad kaba la wan ha ka kyrdan kaba hakhmat eh ha ki jingiakop ha ki kyrdan District, kata kynthup ha ki jingiakop kyntip, jingiatyrko nia, jingthoh essay bad ki prokram kiba iadei bad ka kolshor hapdeng u snem 2020 bad 2025.

Nalor ka kamram kum u nonghikai, u Dr Bang u la noh synniang ruh sha ka roi ka par ha ka imlang sahlang ha kaba u la trei kum u dkhot jong ka Juvenile Justice Board, Khliehriat, u dkhot jong ka Red Cross Society iha 2015–2016, bad kum u nonghikai hapoh Thomas Jones Synod College, Jowai, hapdeng u snem 2014 bad 2017. U la wanrah ruh ia ka rukom hikai kaba thymmai, kynthup ia ka rukom hikai bapher bapher kiba pynshlur ia ki khynnah pule ban long ki nongpule kiba laitluid bad kyntiew ha ka jingiadei ba kham bha ha ki kamra klas lyngba ki jingiamir jingmut bad jingpynbeit ia ki jingeh.

Haba pynpaw ka jingsngewnguh ia kane ka jingpynkup burom, u Dr Bang u la ong, “Kane ka khusnam ka dei ka jingithuh ia ka jingiatreilang jong ka iing ka sem ka jong nga, ki paralok ba iatreilang bad ka tnad pule puthi jong ka District bad ka Jylla. Nga sngewnguh shibun ia U Blei uba la ialam ia nga ban jied ia ka kam hikai kum ka kam bad ban shakri ia ka imlang sahlang ha ka rukom kaba rit.”

Kum u riew shemphang ha ka liang ka pule puthi, u la buh ruh ka jingai jingmut ban pynkhlain ia ka rukom hikai bad u la kyrpad ruh ban aijingkyrshan pisa ia ki skul shimet kiba noh synniang shibun ha ka liang ka pule puthi, khamtam ha ka dur jong ka grant-in-aid na ka bynta ban kyntiew ha kaba iadei bad ki jingtei bad ka tulop jong ki nonghikai.

Nalor kata u la ban jur halor ka jingdonkam ban pyntreikam pura ia ka National Education Policy (NEP), ban kynthup ia ka ktien Khasi ha ka khyrnit ba phra jong ka Riti Synshar jong ka ri bad ban pynkhlain ia ka jingkyrshan ia ki khynnah kiba donkam kyrpang lyngba ki lad jingiarap kiba biang.