Ioh pdiang tablet 800 ngut ki khynnah pule ha East Jaintia Hills

Syllad | The Rising MeghalayaMay 16, 2025

Haduh 800 ngut ki khynnah kiba dang pule ha ka kyrdan Higher Secondary na East Jaintia Hills ki la ioh pdiang ia ki Tablet (M-TABs) lyngba ka Chief Minister’s Students Digital Learning Scheme ha ka prokram ba la pynlong haka 15 tarik Jymmang ha Khliehriat West Community Hall.

Ha kane ka prokram ba la pynlong da ki bor pyniaid District ha ryngkat ka jingiatreilang bad ka Tnad Education la ia don lang ruh u MLA ka thain u Bah Kyrmen Shylla, Deputy Commissioner u Shivansh Awasthi, ka Additional Deputy Commissioner Kong JU Kharpuri, Assistant Commissioner F Wann, District School Education Officer A Syiem, ki nonghikai bad ki khynnah skul.

Haba aijingkren ha ka jingialang u Bah Kyrmen Shylla u la kyntu ia ki khynnah ba kin pyndonkam hok ia ki tiar digital kiba ki la ioh pdiang na ka bynta ki jingdonkam kiba iadei bad ka pule puthi, ka akor ka burom bad ka jingtrei shitom ban pynwandur ia ka lawei jong ki.U la ban jur ruh halor ka bynta kaba kongsan jong ki kmie ki kpa ha ka jingbtin lynti ia la ki jong ki khun ki kti ha ka jingiaid lynti ha ka liang ka pule puthi ka jong ki.

U Deputy Commissioner ha ka jingkren u la kdew halor ki jingpyrshang jong ka sorkar ban kyntiew ia ka jingnang jingtip bad halor ka jingkongsan jong ki kor digital khamtam hadien jong ka khlam Covid. U la kdew ruh ba ia ki talbet lah ban pyndonkam ym tang ha ka liang ka pule puthi hynrei ruh ban pynroi ia ki sap ki phong bad ban plie ia ki lad ki lynti ha ka liang ki kam ki jam bad ka kamai kajih. U la aijingmut ruh ia ki khynnah pule ba kin pyndonkam ia ka jingstad teknoloji da ka jingkitkhlieh bad ban tip ia ki jingma kiba lah ban mih lyngba ki rynsan social media.

Shwa kane, ka MLA ka Sutnga-Saipung ka Kong Santa Mary Shylla ka la sam ia ki tablet sha kawei pat ka kynhun ki khynnah pule ha kane ka juh ka jaka. Da kaba shim na ka jingshem jong ka ha ka jingleit ba dang shen sha Belgium na ka bynta ka Artificial Intelligence Conference, ka la pynpaw halor ka jingnangkiew ha ka jingpyndonkam ia ka teknoloji ha ka pule puthi da kaba pynshlur ia ki khynnah pule ba kin pyndonkam hik ia ki kor digital.

Haduh 800 ngut ki khynnah pule na ki 13 tylli ki Higher Secondary School kiba don hapoh ka District ki la ioh pdiang ia kine ki tablet kiba la dep buh lypa halor ki jinghikai ba la shna kyrpang na ka bynta ki khynnah kiba pule ha ka Arts, Science bad Commerce.