Ioh pdiang khusnam Young Leader Award ka nurse na  Supercare Hospital

Syllad | The Rising MeghalayaJune 7, 2025

Ka Supercare Hospital, Shillong ka pynpaw ka jingsngew sarong bad jingkmen ban pyntip ba ka kong Rikadeisuk Suting, kaba trei kum ka Quality Nurse, kala ïoh pdiang iaa ka khusnam Young Leader Award (YLA) 2025 na ka Association of Nurse Executives India (ANEI) halor ka jingshemphang ban khmih bad sumar ia ki nongpang ba kin ym sngew ban khia, ban pynbha ia ka rukom sumar bad ban iarap ia ki briew ha shnong ha thaw lyngba ka kam ki nos.

Ia kane ka khusnam la ioh pdiang ha ka jingialang jong ka ANEICON 2025, ha Lulu Bolgatty International Convention Hall, Grand Hyatt Kochi, Kerala, ha ka 30 tarik u Jymmang, 2025. La ialam ia kane ka jingai khusnam da u Chief Guest, u Dr. Rajan N. Khobragade, uba long u Additional Chief Secretary jong ka Tnad Health & Family Welfare ka Sorkar Kerala. 

Ka kong Suting kala ioh ia ka khusnam namar ka jingaiti jong ka met bad mynsiem ban pyndonkam thikna ia ki rukom treikam jong ki nurse ba la dep pynshisha ba ki long kiba biang, bad ba la shim ïa ki sienjam ban kham pynbha shuh shuh ïa ka rukom sumar ïa ki nongpang ha Supercare Hospital. Ka long ruh ka nurse kaba paw ha ka rukom pyrkhat ha ka liang ka jingsumar, bad iba trei shitom ban nang pynbha shuh shuh ïa ka rukom sumar da ka mynsiem sngewsynei kaba wanrah jingmyntoi shibun.

La kyrshan bad ialam lynti ia ka da ka kong Mary B. Lyngdoh, kaba dei ka Nursing Superintendent, bad da ka kong Rikadeilang Paslein, Deputy Nursing Superintendent. Ka jinghikai bad jingïalam lynti jong kine baroh ar ngut ka bteng ban kyntiew bad ïarap ïa ki nos jong ka hospital ban sumar ïa ki nongpang ha ka rukom kaba paka tam.

Ka Supercare Hospital ka dei ka hospital kaba nyngkong eh ha Meghalaya ban ïoh ïa ka NABH accreditation kaba pura, kumjuh ruh ha ka NABH Emergency bad ka NABH Nursing Excellence. Ka dei ruh ka hospital kaba nyngkong eh ha Northeast India ban ïoh ïa ka NABH Nursing Excellence, bad kane ka pyni ïa ka jingaiti jong ka hospital ban wanrah ïa ka rukom trei bad ka rukom ai jingsumar kaba bha tam, bad ban kyrshan bad kyntiew ïa ki nongtrei jong ka.

“Kane ka jingïoh khusnam kam dei tang ka jingjop kaba shimet na ka bynta ka kong Suting, hynrei ka dei ruh ka rukom pyni jingsngewnguh na ka bynta ka jingtrei shitom bad ka jingkongsan jong ka kynhun ki nos baroh kawei hi ha ka jingai jingsumar—khamtam hangne ha Northeast, ha kaba kum kane ka jingïalam lynti ka kyntiew ïa ka rukom ai jingsumar sha kaba kham bha shuh shuh ha ka lawei,” ong u Dr. RS Thangkhiew, Managing Director jong ka Supercare Hospital.

U Bah Damien Marwein ruh, Chief Operating Officer, ula ong, “Ha Supercare Hospital, ngi kyntu bad kyrshan ia ki nos bad ki doktor ban ialam, ban ai jingmut, bad ban wanrah ki jingkylla kiba myntoi ha ka rukom ai jingsumar ha Meghalaya baroh kawei.”