Kaba nyngkong ha North East: Ioh pdiang ka Supercare Hospital Shillong iaka NABH Nursing Excellence Certification

Syllad | The Rising MeghalayaAugust 18, 2023

Ka Supercare Hospital, Shillong, ka la ioh ia ka jingithuh kum ka ‘Nursing Excellence Certification’ namar ka jingbud ryntih ïa ki kyndon ka National Accreditation Board for Hospitals and Healthcare Providers (NABH)  ha ka jingjingai jingshakri kaba biang tam ha ka kam Nursing bad ka dei ruh kaba nyngkong eh ha ka thain shatei lammihngi.

Ka NABH ka dei ka kynhun kaba khmih ïa ka jingtrei bad jingshakri babha ki hospital ha India bad ka dei ruh ka bynta jong ka Quality Council of India (QCI), ka kynhun ha ka ri kaba kyntiew bad pynneh ïa ka jinglehbha ha kiba bun ki liang ha kylleng ka ri. Ka NABH accreditation program ka buh ïa ki kyndon na ka bynta ki lad sumar pang ha India, kynthup ia ka jingshakri ki nurse, ban pynthikna ba ki ai ïa ka jingsumar ba paka tam bad ba don jingshngaiñ.

Na ka liang u Bah Damien Marwein uba dei u Chief Operating Officer jong ka Supercare hospital lyngba une u kyrwoh u la ong ruh ba kine ki kyndon ki dei kiba la pynshong nongrim ha ki rukom sumar babha tam bala leh ha kylleng ka pyrthei bad la pynwandur ban nang pynbha ïa ka jingshngaiñ ki nongpang bad ka jingsumar babha ha ki hospital. Ki kyndon ka NABH mynta ki dei ki kyndon ba halor eh na ka bynta ki hospital ha India. Lada ka hospital kala ïoh jingithuh na ka NABH, la shim ba ka dei ka jaka sumar babha bad ka ïoh jingithuh na kylleng ka pyrthei.

U la ong ruh ba ki kyndon jinglehbha ha ka kam nurse bala buh da ka NABH ki long ki jingbatai ruh halor kumno ban pynshongdor ïa ka jingshakri ki nurse ha ki jaka sumar. Ka jingai certificate, kaba khmih lyngba ki 7 tylli ki bynta ba kongsan, ka khmih bha kumno la ai jingsumar da ki nurse ha ka rukom ba shngaiñ ba paka bad ba burom. Ka ïarap ruh ban pynïaid, ban btin lynti bad kyntiew ïa ka kam nurse bad ka batai ruh ïa ki nurse administrator bad ki supervisor kumno ban kyrshan bad ai ïa ka jingsumar katkum ka jingdonkam ba wan hakhmat eh.

Hadien bala khmih bniah bha ban bud ïa ki 48 tylli ki kyndon ba kynthup ïa ki 216 tylli ki jingthmu, ïa ka Supercare Hospital la ai ïa ka ‘Nursing Excellence Certification’ ha ka 13 Jylliew 2023 ka ban treikam haduh 12 Jylliew 2025.  Ka Supercare Hospital kala poi sha ki mawmer bakhraw, namar ba ka dei ka jaka sumar ba nyngkong bad tang ma ka ha ka thaiñ shatei lam mihngi ba ïoh ïa ka NABH Certification for Nursing Excellence.

Nalor kiwei ki kam ba paw ba kala nang ïoh, ka Supercare Hospital ka dei ruh tang ma ka ka hospital ha ka thaiñ shatei lammihngi kaba ïoh ïa baroh ki jingithuh NABH Accreditation for Hospital, NABH Certification for Emergency bad NABH Nursing Excellence.

Haba kren shaphang ki kam bakhraw bala leh da kiba bun, ki jingjop ba dang shen ki pyni ba kala kiew bha hapoh ka jingïalam u Managing Director, u Dr. R.S. Thangkhiew, uba la pynpaw ïa ka jingsngew sarong ha kine ki jingjop da kaba ong, “Kane ka jingjop ka long ka jingtynjuh ïa ki nurse ba kin nang trei bha, ka jingtbit ba ki don kaba lam sha ka bha ka miat kiba shah sumar. Ka ïalam ïa ngi sha ka lynti ba kwah leh bha shuh shuh ha ka thaiñ shatei lam mihngi.”

Shuh shuh na ka liang u Chief Operating Office ula ong, “Kane ka jingïoh certificate ka btin ïa ngi kumno ban nang trei bha, ban pynbha shuh shuh ïa ka jingtreikam, bad ban lah ban shim rai. La pynlah ïa kane da ka jingïatreilang ka kynhun ki nurse hapoh ka jingïalam i Nursing Superintendent, i Kong Mary Lyngdoh. Katba ka Supercare Hospital ka rakhe ïa une u mawmer, ngi kut jingmut skhem bad kane ka long u mawjam sha kiei kiei kiba kham khraw.