Ioh pdiang ka kynhun u Prof Tanie na NEIGRIHMS ia ka ‘Best of Indian Journal of Ophthalmology Award’

Syllad | The Rising MeghalayaApril 7, 2025

U Prof Tanie Natung bad ka kynhun jong u na NEIGRIHMS ki la ioh pdiang ia ka khusnam ‘Best of Indian Journal of Ophthalmology Award’ ha ka 40th Asia-Pacific Academy of Ophthalmology Congress ha ka jingiatreilang bad ka bad ka 83rd Annual Conference jong ka All-India Ophthalmological Society kaba la long naduh ka 3-6 tarik Iaiong 2025 ha New Delhi.

Ki la don haduh palat 13500 ngut ki nongmihkhmat na ki ri bapher bapher kiba la wan iashim bynta bad iasam ia ki jingtip ha kaba iadei bad ka Science, ki jingshem, ki jinghikai bad ki jingmih na ki jingwad bniah katkum ka Science ha kane ka APAO-AIOS conference.

Ia kane ka khusnam la ai halor ka jingwad bniah kaba ianujor ia ki artylli ki buit ha ka ban jied ia ka rukom khein ia ka bor kaba biang eh jong ki Lens na ka bynta ki jingpang cataract da kaba pynbha ia ka jingmih jong ka jingpeit na ka bynta ki nongpang kiba duna eh ha ka bor iohi.

U Prof Natung u la bynrap ba kane ka jingwad bniah kan ialam ia ki doktor sumar khmat ha kylleng ka pyrthei ba kin ai ka jingmih kaba bha tam ha kaba iadei bad ka jingsumar khmat. Na ka liang ka Dr Ishita Pandey, Dr. Benjamin Nongrum bad Dr. Ester K Sekhose na ka Department of Ophthalmology NEIGRIHMS ki la pynlong ia kane ka jingwad bniah hapoh ka jingialang bad jingbtin lynti da u Prof. Tanie Natung.

Na ka liang u Director ka NEIGRIHMS u Prof. Nalin Mehta u la ai khublei ia u Prof. Tanie Natung lem bad ka kynhun halor ka jingtrei shitom ka jong ki na ka bynta ban pynlong ia kane ka jingwad bniah ha kaba iadei bad ki lad aijinsumar ia ki khmat.

Ka Indian Journal of Ophthalmology ka dei ka thup jingthoh ba pawnam bha bad kaba don ka jingktah kaba wanrah ia ka jingkylla kaba bha. Ka Asia-Pacific Academy of Ophthalmology ka dei ka kynhun kaba heh tam jong ki doktor khmat jong ka thain Asia Pacific bad ka All India Ophthalmological Society kadei ka kynhun kaba heh tam jong ki seng kiba ai ia kano kano ki lad aijingsumar kaba don haduh kumba 27000 ngut ki dkhot kat haduh mynta.