Ioh nongkitkam thymmai ka JSU Khliehriat Circle

Syllad | The Rising MeghalayaJune 30, 2023

Ka Jaintia Student Union (JSU) central body kala pynskhem iaki nongkitkam bathymmai jong ka Jaintia Students Union (JSU) Khliehriat Circle na ka bynta ka samoi 2023-2026 haka jingialang kaba la long ha Community Hall Khliehriat West haka sngi Thohdieng.

Iaka jingialang la pyniaid da u Rikut Pareiñ nongialam barim ka JSU haka jingdonlang u kongsan u MLA barim ka Khliehriat u Justine Dkhar, u DSP ka East Jaintia Hills District u Jason Mairom bad u Dr. Phervision Nongtdu Principal Jaintia Eastern College, Khliehriat kum ki symbud kongsan kumjuh ki nongialam sengbhalang kynthup ki nongialam ka KSU, HNYF, FKJGP bad EJNC .

Iaki dkhot nongkitkam la pynskhem da u president JSU Central body u Jersom Shylla uba la kyntu iaki nongkitkam bathymmai ban trei shitom haba shakri iaka jaitbynriew.

U kongsan u Justine Dkhar ula kren ai mynsiem iaki dkhot ban iaid haka lynti haka lynti ka hok bad ban trei shitom ban im ka ri bad ka jaitbynbriew.

U Dr. Phervision haka jingkren ula ong kumba ka JSU kadei ka seng jong ki samla pule kumta ula kyntu iaki nongialam ban buddien bha halor ka jingdawa CUET Examination centre hapoh ka jylla khnang ban lait ki samla ban leit sha bar jong ka jylla.

U General Secretary JSU u Treiborlang R Suchen ula bynniaw halor ka jingpynslem ka sorkar ban pynbiang ia ki jaka eksamin CUET ban ioh myntoi ki khynnah pule. Ula kren ruh shaphang u drok bad ula ong ba ka JSU ka kloi ban ai ka jingiatreilang bad ki bor pulit kumjuh ki bor shnong ban tehlakam iaka jingwan rung u drok shapoh ka thaiñ ka shnong bad ka jylla.

Ki katto katne ki nongkitkam kiba hakhmat ki long u president Livingson Dkhar Sana, Vice president Winchester Salahe, Secretary Ajoymension Lyngdoh bad kiwei kiwei.