Ioh MLA kynthei ba nyngkong ka Rilum Jaintia da ka jingjop ka Santa Mary Shylla liem u heh ka Congress wanphai biang u Conrad, Mukul bad u Metbah

Syllad | The Rising MeghalayaMarch 2, 2023

Ka Kong Santa Mary Shylla kala kylla long ka MLA kynthei kaba nyngkong tam ha rilum Jaintia hadien ba kala pynliem ia u hehduh ka Congress bad u MP ka Shillong Seat Vincent H Pala na Sutnga Saipung Constituency hadien ka jingniew vote kaba long haka sngi Palei.

Ka kong Synta Mary nalor ba kala tam ia u MP ma Pala kala pynliem ruh ia u MLA u ma Shitlang Pale kyrtong UDP.

Ka Santa kala ioh vote haduh 16974 vote kynthup iaka 255 ka postal votes, u ma Pala 15146 bad u ma Shitlang Pale 10453.

Katba ki ar ngut ki heh ka NPP bad UDP u Conrad K Sangma bad u Metbah Lyngdoh kila wanphai biang sha ka Meghalaya Assembly.

U National President ka NPP u Conrad ula ioh vote 10671 bad u kyrtong ba wan ba ar u dei u Bernard N Marak uba ioh 7420. Katba u Bah Metbah ula ioh vote 19066, u kyrtong ba wan ba ar u dei Batskhem Ryntathiang uba la ioh 18911.

U Dr Mukul Sangma myntri rangbah barim ka jylla ula wanphai biang kum u MLA bad ula jop na Songsak da kaba pynliem ia Nihim D Shira u kyrtong NPP da 372 vote. U Mukul ula ioh vote 12689, katba Nihim 12317 vote bad u Champion R Sangma kyrtong Congress ula wan ba lai hadien ba ula ioh tang 2232.

Une u Nongialam ka AITC ula shah pynrem ha Tikrikilla ha u MLA barim bad kyrtong ka NPP Jimmy D Sangma.

U Myntri sorkar barim uba la liem ha kane ka elekshon u dei u James Pangsang Kongkal Sangma. U James ula shah pynliem ha u Rupa M. Marak uba tam da ka 18 vote hadien ba u la ioh 15702 vote

U MLA ka Amlarem bad Myntri kam pohiing barim ula wanphai biang kum u MLA. Ka jingiakhun ha kane ka constituency kala long kaba iathain bha hapdeng u kyrtong ka NPP ma Stephanson Mukhim.

Haka jingianiew vote la sakhi ba ka jingniew vote hapdeng kine ki ar ngut kala long kaba mar iaryngkat, hynrei u ma Lahkmen ula tam noh ki postal vote da 57.

Kiwei pat ki MLA bad Myntri sorkar kiba la wan phai biang na rilum Jaintia kidei u ma Sniawbhalang Dhar, Comingone Ymbon, Kyrmen Shylla, Nujorki Sungoh bad Wailadmiki Shylla.

Haba phai sha ka BJP wat la hiar ki nongialam ka Delhi kynthup ia u Myntri Rangbah Duh ka Ri Narendra Modi, u Myntri kam pohiing Amit Shah bad u President JP Nadda, ka khlem kala lah ban khur tang 2 seat kata ka Pynthorumkhrah bad ka South Shillong Constituency daka jingjop u bah Sanbor Shullai bad AL Hek.

Ha kane ka jingniew vote ka NPP kala jop 26 seat na ki 59 tylli ki constituency, ka UDP-11,  AITC- 5, Congress-5, BJP-2,  VPP-4, PDF-2, HSPDP-2, Independent-2.