Ioh Lifeguard ka Darrang Tourism ban shngain ki nongwan kai ha wah Umngot

Syllad | The Rising MeghalayaJanuary 4, 2021

Ka Darrang Tourism Promotion and Development Society ryngkat ka jingiatreilang bad ka Tour Operators Association of Meghalaya da ka jingkyrshan jong ka sorkar jylla lyngba ka tnad Tourism kala ai jinghikai ne training iaki nongshong shnong na ka bynta ki nongking lieng kynda ba kin trei kum ki guide bad ki lifeguard ha Darrang, ka shnong kaba don hashwa ban poi ka Shnongpdeng kaba la khring bha mynta iaki nongwan kai suwari.

Ki nongwan ai jinghikai kidei na ka LifeSaving, Mumbai kiba la tbit bha ha kane ka kam kila ai jinghikai iaki laiphew saw ngut kiba la jied kyrpang na ka shnong Darrang, ban pyntbit kumno ban ai jingiarap ia ki nongwan jngohkai ha ka por ba ki ngam um lane ha kino kino ki jingjia mynsaw kiba donkam jingiarap ba kyrkieh.

Kine kiba la shah ai jinghikai ki la ioh shibun ki jingtip bad jingstad ban iarap ia ki briew kum haba ngam jyllop, ur lane hap, kyllon kynsan, kiba accident bad kiwei kiwei. Ki lah ioh ruh ka jinghikai kyrpang na ka bynta ka CPR (Cardio Pulmonary Resuscitation) haba don ba shitom.

Ka Darrang Tourist Spot mynta kala don iaki nongtrei ba kyrpang ban ai jingiarap haba don jingjia ba kyrkieh kiba ki khot kum ki Lifeguard bad ki paidbah ki lah ban wad ia kine ki nongtrei lada donkam haba ki wan sha Darrang.

U Bah Reachingson Kongwang chairman ka Darrang Tourism Promotion and Development Society, u la ong ba ka long ka jingkmen kaba khraw ba ka tnad Tourism ka sorkar jylla ka la sngap ia ka jingkyrpad ka Society ban ai kum kine ki jait jinghikai ia ki khun samla ka shnong kiba trei ha ki kam niahlieng bad ki guide ha Darrang Tourist Spot khamtam eh ban ioh jinghikai ha shnong lajong bad kawei ka jingkyrpad na ka liang ka Society ia ka sorkar lyngba ka tnad Tourism ba kan iarap ban ai ki tiar ki tar (Life Saving materials) kum ki life jackets, spine board, wheel chair, ki tyllai, ki saving bag bad kiwei kiwei kiba donkam ha kaba iadei bad kane ka jingai jinghikai, khnang ba yn lah shisha ban iarap ia ki paidbah ha ka por ba don ki jingjia mynsaw lane ngam um.