Ioh lad u Sirdar ban plie ia ka ophis ka Khatarshnong Laitkroh C&RD block ha ka jingiadon lang u CM

Syllad | The Rising MeghalayaJune 23, 2025

U Sirdar ka Elaka Laitkroh u Bah Pailastar Kharkongor haka 23 tarik Jylliew u la ioh ia ka kabu kaba kyrpang ban plie ia ka ophis jong ka Khatarshnong Laitkroh C&RD block ha ka jingiadonlang u Myntri Rangbah ka Jylla u Conrad K Sangma bad ki MLA kaba kynthup ia u Bah Gavin Miguel Mylliem bad Bah Matthew Beyond Kurbah.

Haba kren ha ka jingialang u Myntri Rangbah u la ong ba ka sorkar ka kut jingmut skhem ban pyndon bynta lang ia ki nongialam shnong bad ki paidbah baroh ha ki sienjam kiba kongsan na ka bynta ka roi ka par.

“Ngi ngeit ba ka jingshakri kaba kynthup lang ka sdang lyngba ka jingtreikam kaba kynthup lang. Ka jingplie paidbah ia ki jingtei jong ka sorkar da ki nongialam shnong kum u Sirdar ka pyni ia ka jingthmu ka jong ngi ban wanrah ia ka jingsynshar kham shajan sha ki paidbah bad pynrung ia ka jingsngew jong ka jingkitkhlieh bad ka jinglong trai,” u la ong.

Kane ka jingtei kaba thymmai jong ka Block Integrated Development Complex ka dei shibynta jong ka sienjam kaba iar ban kyntiew  ha kaba shna bha bad pynheh ia ki jingtei ha baroh ki 46 tylli ki block kiba la don lypa bad 10 tylli ki block kiba dang shu dep pynkha thymmai ha kylleng ka jylla Meghalaya. Kane ka jingtuklar ka thmu ruh ba pynkylla dur ia ki jingtei kiba la rim bad kiba la jot sha ki jingtei kiba thymmai katkum kane ka juk bad kiba biang ia ki jingdonkam na ka bynta ki nongshong shnong.

“Haba ngi la shimti ia ka kam ha u snem 2018, ngi la shem ba kiba bun ki ophis jong ki block ki la rim bad jot rathai. Kumta ngi la shim ia ki sienjam ban kyntiew bad pynbha ia ki jingtei ha ki thain nongkyndong ha baroh ki district. Naduh ka jingmaramot ia ki Police Station bad ki ophis Sub Division sha ka jingbhah tyngka ban tei ia ki ophis DC kiba thymmai, ki quarter jong ki nongtrei bad ki Multipurpose Hall, ngi dang trei ban tei ia ka nongrim kaba khlain na ka bynta ka jingshakri ha ki shnong ki thaw,” bynrap u Myntri Rangbah.

Haba banjur halor ka jingkongsan ha ka jingiashim bynta lang jong ki nongshong shnong, u Conrad u la ong, “Ngi kwah ia ki paidbah ba kin ym long tang ki nongpeitkai ia ka jingkiew jong ka roi ka par, hynrei ba kin ia don bynta lang bad ka. Da kaba iawer ia baroh kiba don bynta lang hapoh ki shnong ki thaw ban plie ia ki skhim kiba iadei bad ka bha ka miat nalor ki project bapher bapher ngi pynshlur ia ka jingsngew sarong bad ka jingkitkhlieh jong ki paidbah nongshong shnong.””

Kane ka jingtreikam kaba pynleit jingmut na ka bynta ki paidbah ka dei ka roi ka par kaba don ia ka jingiatreilang kaba shim ia ka jingkongsan jong ki khlieh nongsynshar, ki nongialam shnong bad ki nongshong shnong ha ka ban tei ia ka jingiaid shaphrang jong ka jylla.