Ioh kurup ksiar ba shongdor T. 70 lakh, shah kem uwei haki Pulit West Jaiñtia

Syllad | The Rising MeghalayaJune 9, 2019

JOWAI: Ki Pulit jong ka West Jaiñtia Hills District hadien ba la ioh jingtip halor ka jingiaid ki mar beaiñ lyngba ka district kila pynlong ïaka jingkhynra kali (Naka) ha Phramer bad ïoh kurup haduh 12 biskit ka ksiar ba shongdor T.70 lak.

Ka kynhun Special Team hapoh ka jingialam Donkupar Moksha MPS, Dy.SP Traffic kila pynlong ka jingkhynra kali kiba wan na Phramer bad haka por kumba 1 AM kila khynra iaka bos Night Super kab don u number AS 01 KC 9461.

Kane ka kali kadei kaba wan na Jiribam Manipur bad ka thmu ban leit sha Guwahati. Baroh ki nongshong kila shah khynra ki tiar ki tar jong ki bad haka por ba khynra la lap 12 biskit ka Ksiar kaba khia 166 gms shi biskit na u Amir Hussain, uba na Lilong Turel Ahanbi, Manipur.

Ki Pulit kila kem ia u Amir bad ka jingtohkit kala iaid shakhmat.