Ioh kurup ki pulit ia bun tylli ki tiar siat bad shibun bah ki kuli ba la buhrieh ha khlaw EGH

Syllad | The Rising MeghalayaJune 25, 2025

Hadien ba la ioh ia ka jingtip kaba thikna, ki bor pulit ha ka step jong ka 24 tarik Jylliew ki la ioh ban kurup noh ia bun tylli ki tiar siat bad shibun bah ki kuli na ka jaka khlaw kaba rben hapoh East Garo Hills District.

Ka kynhun ki pulit na Williamnagar bad Rongjeng Police Station, EGH hapoh ka jingialam jong u Additional Superintendent of Police, Williamnagar ki la pynlong ia kane ka jingkhynra ha katei ka khlaw kaba rben hajan ka shnong Chikama kaba hap hapoh Rongjeng Police Station naduh ka por 11.30 mynmiet jong ka 23 tarik.

Ha kane ka jingkhynra kaba khlem shongthait ki pulit ki la ioh ban kurup noh ia kine ki tiar siat bad shibun bah ki kuli ha ka por kumba 2 baje mynstep jong ka 24 tarik Jylliew na jan ka shnong Chikama.

Kine ki tiar ba la ioh kurup ki kynthup ia kawei ka pistol shna hi (country made) bad 212 tylli ki kuli AK, 22 tylli ki kuli siat liengsuin, 13 tylli ki kuli siat liengsuin ba la sniew bad khlem snep, 11 tylli ki snep ba synjor bad 52 tylli ki kuli 6.5 mm.

Na ka liang u Superintendent of Police (SP) u Bah S.A. Rynjah u pyntip ba kine ki tiar la kurup noh na katei ka jaka ha ka jingiadon lang ki sakhi ba laitluid, bad bynrap ruh ba ka jingtohkit halor kane ka la iaid shakhmat.