Ioh kurup ki pulit haduh 1 kilo u drok amphetamine tablet na East Jaintia Hills

Syllad | The Rising MeghalayaOctober 18, 2023

Ki pulit haka sngi ba Ar ki la ioh ban kem noh ia uwei u nongkhaii drok bad ioh kurup haduh 1 kilo ki dawai kuli amphetamine tablet ba beain na East Jaintia Hills.

U SP ka district u Jagpal Singh Dhanoa lyngba une u kyrwoh u la ong ba une briew uba la shah kem noh u dei uba la tip kyrteng kum u Joseph Hmangaih Zuala uba dei napoh South Aizawl, Mizoram.U Zuala u la shah kem napoh kawei ka bus night super kaba don ia u nombor (AS 01 LC 6216) na ka surok bah NH-6 hapoh ka shnong Nongsning.

U la ong ruh ba hadien ba la leh ia kaba donkam katkum ki kyndon ain ka NDPS Act ha ka jingiadon lang ki skahi ba laitluid la pynlong ia ka jingtalasi ia ka synduk suit case jong u ha kaba la lap ia ka plastik kaba don ia kine ki jingdih pynbuaid kiba don haduh 1.017 kilo.

U SP u la ong ruh ba katkum ki jingtip ba la ioh la ong ba ia kine ki jait dawai kuli la khaii beain ha ka rukom jong ki mar ki ban dang sain ne raw materials sha kiwei pat ki ri dewlynnong ba marjan ha kaba la sain biang shuh shuh ia ki sha ki sha ki methamphetamine tablets.

Hadien kane ka jingioh kurup la rejistar case hapoh Khliehriat Police Station, bad mynta ka jingtohkit ka la iaid shakhmat ban lapdien shuh shuh ia ki jingtreikam ba beain jong ki.